ԼՈՒՐ ԿԱԴՐ

Լուսանկարն արվել է Արցախում

Լեռնային Ղարաբաղի Հանրապետության մայրաքաղաք Ստեփանակերտում գործում է եվրոպական բրենդներ արտադրող մի ընկերություն, որի արտադրանքը 100 տոկոսով իրացվում է Եվրոպայում, ԱՄՆ-ում եւ Ռուսաստանում: Ու որքան շատ լինի արտադրանքը, զարգանա Արցախի տնտեսությունը, այնքան պատերազմի հավանականությունը կնվազի:

 
ՀԱՐՑ. Ես ուզում եմ իմանալ՝ բժշկասոցիալական փորձաքննության հանձնաժողովը ո՞ր դեպքում պետք է անձին լրացուցիչ հետազոտման ուղեգիր տրամադրի: Ընդհանրապես, որ դեպքում է տրամադրվում նման ուղեգիր:

Օֆելյա Ռուբինյան (49 տարեկան, 2-րդ կարգի հաշմանդամ)

ՊԱՏԱՍԽԱՆ. Օ. Ռուբինյանի հարցին ի պատասխան՝ հայտնում ենք, որ բժշկասոցիալական փորձաքննության հանձնաժողովն անձին լրացուցիչ հետազոտման ուղեգիր տրամադրում է՝
ա) ախտորոշման ճշտման,
բ) հետազոտման հատուկ մեթոդների կիրառում պահանջող դեպքերում,
գ) ներկայացված բժշկական հիմքերի հավաստիությունը ճշտելու,
դ) ինչպես նաեւ անհրաժեշտ կամ լրացուցիչ տեղեկություններ ստանալու համար: (Հիմք՝ Հայաստանի Հանրապետության կառավարության 02.03.06 թվականի թիվ 276-Ն որոշմամբ հաստատված կարգի 18-րդ կետ):

ՀՀ բժշկասոցիալական փորձաքննության գործակալություն

«ԺՈՂՈՎՈՒՐԴ». Ավելացնենք, որ 2016թ. հունվարի 1-ի դրությամբ հաշմանդամների հաշվառման հանրապետական շտեմարանում հաշվառված է 200.177 հաշմանդամություն ունեցող անձ, որն ընդհանուր բնակչության 6,6%-ն է: Նրանցից 7 801-ը՝ 3,9 %-ը հաշմանդամ երեխաներն են: Ի դեպ, ընդհանուր թվից 1-ին խմբի հաշմանդամներ են 10268-ը, որն ընդհանուր հաշմանդամություն ունեցող անձանց 5,1%-ն է, 2-րդ խմբի հաշմանդամները 80 328-ն են (40,1%), 3-րդ խմբի հաշմանդամները 101.780-ն են (50,9%):

 
ՀԱՐՑ. Խնդրում եմ ասեք, թե ինչպե՞ս կարող եմ որդեգրման ենթակա երեխաների մասին տեղեկություններ իմանալ:

Ռիմա Սանթրոսյան (39 տարեկան, տնային տնտեսուհի)

ՊԱՏԱՍԽԱՆ. Որդեգրման ենթակա երեխաների մասին տեղեկություններ ստանալու նպատակով հաշվառված որդեգրել ցանկացող ՀՀ քաղաքացիները դիմում են իրենց բնակության վայրի մարզպետարանի աշխատակազմ կամ նախարարություն, իսկ հաշվառված որդեգրել ցանկացող ՀՀ սահմաններից դուրս բնակվող ՀՀ քաղաքացիները եւ օտարերկրացիները՝ կենտրոնական մարմին: Հաշվառված որդեգրել ցանկացող ՀՀ քաղաքացին, ՀՀ սահմաններից դուրս բնակվող ՀՀ քաղաքացին եւ օտարերկրացին կարող են ծանոթանալ երեխաների անձնական գործերին՝ նախընտրելի չափանիշներով երեխա ընտրելու համար: Տրամադրված տեղեկությունների հիման վրա որդեգրման ենթակա երեխային որդեգրելուց հրաժարվելու դեպքում որդեգրել ցանկացող անձը հաշվառումից չի հանվում:
Այն դեպքերում, երբ երեխային որդեգրելու ցանկություն է հայտնել ՀՀ սահմաններից դուրս բնակվող երեխայի խորթ հայրը, խորթ մայրը, նրա ազգականները կամ, երբ երեխայի ծնողների եւ որդեգրել ցանկացող անձի (անձանց) միջեւ ՀՀ օրենսդրությամբ սահմանված կարգով առկա է գրավոր համաձայնություն, որդեգրման նպատակով երեխայի կենտրոնացված հաշվառումից հետո 3 աշխատանքային օրվա ընթացքում ՀՀ աշխատանքի եւ սոցիալական հարցերի նախարարությունը կենտրոնական մարմին է ուղարկում տվյալ երեխայի անձնական գործի պատճենահանված օրինակը: Այդ դեպքերում որդեգրման ենթակա երեխայի տվյալներն այլ անձանց չեն տրամադրվում:
Որդեգրել ցանկացող անձի կողմից տվյալ երեխայի որդեգրումից հրաժարվելու դեպքում երեխան հանվում է հաշվառումից:

Կենսաթոշակային համակարգի իրազեկման կենտրոն

«ԺՈՂՈՎՈՒՐԴ». Նշենք, որ 2013թ. 241 մարդ պաշտոնապես գրանցված է եղել որպես որդեգրողի թեկնածու: Նրանցից 141-ը արտերկրում բնակվող օտարերկրյա քաղաքացիներ են, իսկ 97-ը՝ Հայաստանում բնակվող ՀՀ քաղաքացիներ: