ՀԱՐՑ. Ես բանակում ծառայելու ժամանակ վիրավորվել եմ: 2006թ. բնակարանի մակերեսի բարելավման խնդրանքով դիմում եմ գրել պաշտպանության նախարարությանը: 2010թ. հետաքրքրվեցի եւ տեղեկացա, որ ես այդ ցուցակում 343-րդն եմ: Ուզում եմ իմանալ, թե հերթս երբ կհասնի, բացի այդ, պատրաստվում եմ ամուսնանալ, հնարավո՞ր է, որ զագսավորվելու դեպքում հերթս առաջ ընկնի, եւ բնակարանային մակերեսի հետ կապված փոփոխություններ լինեն:

ՊԱՏԱՍԽԱՆ. Սուրեն Ստեփանի Գալստյանը 2006թ-ից հաշվառվել է Նոր Նորք համայնքի կողմից ՊՆ ուղարկված բնակարանի բարելավման կարիքավորների հերթացուցակում թիվ 306 հերթական համարով: ՀՀ ՊՆ բնակարանային հանձնաժողովը, ըստ սահմանված կարգի, Ս.Գալստյանի բնակարանային հարցին կանդրադառնա թվով 305 հերթական համարով հաշվառված կարիքավոր ընտանիքներին անհատույց պետական ֆինանսական աջակցություն տրամադրելուց հետո: Ինչ վերաբերում է Ս.Գալստյանի` ամուսնությունից հետո հերթացուցակում առաջ ընկնելուն, ապա նրան անհատույց պետական ֆինանսական աջակցություն կտրամադրվի ըստ հերթի: Բնակարանային մակերեսի հետ կապված փոփոխության վերաբերյալ. բնակարանային հանձնաժողովն առաջնորդվում է 09.06.2006թ. ՀՀ կառավարության 947-Ն որոշմամբ հաստատված կարգի 7-րդ կետի դրույթներով, ըստ որի` 1 սենյականոց բնակարան հատկացվում է նույն սեռի կամ տարբեր սեռի երկու մարդուց բաղկացած ընտանիքին, եթե երեխան 9 տարեկանից փոքր է, ինչպես նաեւ ամուսիններին: 2 սենյականոց բնակարան հատկացվում է 9 տարեկանից մեծ տարբեր սեռի երկու (բացի ամուսիններից) եւ երեք մարդուց բաղկացած ընտանիքին: 3 սենյականոց բնակարան հատկացվում է 4-5 մարդուց բաղկացած ընտանիքներին: 4 սենյականոց բնակարան հատկացվում է 6-7 մարդուց բաղկացած ընտանիքներին:

«ԺՈՂՈՎՈՒՐԴ». Մի քանի պատճառներ, որոնք կարող են որպես առավելություն դիտվել, փաստորեն, հաշվի չեն առնվում, ու Սուրեն Ստեփանի Գալստյանին ոչինչ չի մնում, քան  սպասել բնակարան ստանալու իր հերթին: