Սամվել Ֆարմանյանի նախագահական շտաբից armlur.am-ին տեղեկացնում են, որ այսօր` ապրլի 20-ին, ժամը 15:00-ին թիվ 2 ընտրատարածքային ընտրական հանձնաժողովը քննության առավ պատգամավորության թեկնածու Սամվել Ֆարմանյանի դիմումը, համաձայն որի նախընտրական քարոզարշավի ընթացքում պատգամավորության թեկնածու Վլադիմիր Կարապետյանի կողմից կատարվել է ՀՀ ընտրական օրենսգրքի 20-րդ հոդվածի 2-րդ մասի կանոնների խախտում: Մասնավորապես, թեկնածու Վլ. Կարապետյանի քարոզչական պաստառները փակցվել են թիվ 2 ընտրատարածքում գտնվող բազմաբնակարան շենքերի վրա` չունենալով դրա համար օրենքով սահմանված համաձայնությունը:
Թիվ 2 ԸԸՀ-ի նիստում թեկնածու Վլ. Կարապետյանի լիազոր ներկայացուցչի կողմից չներկայացվեց որևէ ապացույց առ այն, որ թեկնածուն դիմել և ստացել է ՀՀ ընտրական օրենսգրքի 20-րդ հոդվածի 2-րդ մասով սահմանված համաձայնությունը, ինչը պարտադիր պայման է: Հետևաբար, վարույթի տրամաբանական ելքը պիտի լիներ թեկնածու Ս. Ֆարմանյանի դիմումի բավարարումը և, արդյունքում, թեկնածու Վլ. Կարապետյանի կողմից օրենքի խախտումով փակցված պաստառների հեռացումը: Թեև դա իրավական տեսանկյունից կլիներ միակ ճիշտ լուծումը, սակայն քարոզարշավում հավասար մրցակցության իմաստով թեկնածու Վլ. Կարապետյանի համար կստեղծեր լրացուցիչ բարդություններ:
Հաշվի առնելով այդ հանգամանքը` թեկնածու Ս. Ֆարմանյանի ներկայացուցիչը հայտնեց հանձնաժողովին, որ հրաժարվում է ներկայացված դիմումից, որից հետո հանձնաժողովը որոշում կայացրեց կարճել հարուցված վարչական վարույթը:
Հիշեցնենք, որ մի քանի օր առաջ թեկնածու Վլ. Կարապետյանի լիազոր ներկայացուցչի կողմից պատգամավորության թեկնածու Ս. Ֆարմանյանի դեմ ներկայացված նույնաբովանդակ դիմումը հանձնաժողովը մերժեց, քանի որ, ի տարբերություն թեկնածու Վլ. Կարապետյանի, պատգամավորության թեկնածու Ս. Ֆարմանյանը սահմանված կարգով ստացել էր պաստառները փակցնելու համաձայնությունը:
.gif)
