Դիանա Սիրունյանի վիճակը շարունակում է մնալ ծայրահեղ ծանր

Շաբաթ օրը` օգոստոսի 18-ին, սրտամկանի կաթվածից մահացած Սուրեն Սիրունյանի՝ Վանո Սիրադեղյանի թիկնազորի նախկին պետի դստեր՝ Դիանա Սիրունյանի վիճակը շարունակում է մնալ ծայրահեղ ծանր:

Այս մասին այսօր առավոտյան Tert.am -ին հայտնեց “Արմենիա” հանրապետական կենտրոնի վերակենդանացման բաժանմունքի ղեկավար Սուրեն Մակարյանը:

Հիվանդանոցի վերակենդանացման բաժանմունքում հերթապահող բժիշկն էլ հերքեց այն լուրը, թե նախօրեին Դիանա Սիրունյանը ենթարկվել է վիրահատության: Այս մասին, ի դեպ, տեղեկացրել էր լրատվամիջոցներից մեկը, հակառակ բժիշկների պնդումների, թե մինչև չկարգավորվի 17-ամյա աղջկա շնչառությունը, այսինքն՝ ինքնուրույն չշնչի, նա վիրահատության չի ենթարկվի: Հիշեցնենք, օգոստոսի 18-ին Դիանա Սիրունյանը հոր մահվան լուրն իմանալուն պես ինքնասպանության փորձ է կատարել՝ նետվելով շենքի հինգերորդ հարկի պատուհանից:

Նշենք, որ այսօր ժամը 18 00 –ին Կոնդի Սուրբ Հովհաննես եկեղեցում տեղի կունենա Սուրեն Սիրունյանի հոգեհանգստյան արարողությունը:

Լուսանկարում Սուրեն Սիրունյանի ընտանիքն է, ձախից՝ կինը, մեջտեղում՝ Դիանան, աջից՝ ինքը՝ Սուրեն Սիրունյանը

Լուսանկարը՝ Blognews.am-ից

Tert.am