Ադրբեջանի նախագահ Իլհամ Ալիևը ընդունել է ԵԱՀԿ Մինսկի խմբի ամերիկացի համանախագահ Ջեյմս Ուորլիքին, ֆրանսիացի համանախագահ Պիեռ Էնդրյուին և ռուս համանախագահ Իգոր Պոպովին, ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկին:
Ինչպես հայտնում են ադրբեջանական ԶԼՄ-ները՝ հղում անելով երկրի նախագահի կայքում տեղակայված հաղորդագրությանը, Ալիևը հայտարարել է, որ Հայաստանի ղեկավարությունը չի դադարեցնում սադրանքները: Նա նաև հիշեցրել է, որ անցած տարվա հոկտեմբերին Փարիզում տեղի ունեցած Հայաստանի և Ադրբեջանի նախագահների հանդիպումից հետո հայկական կողմը սկսել է լայնամասշտաբ ռազմական զորավարժություններ իրականացնել:
Ալիևի խոսքով՝ Հայաստանը պարբերաբար ռմբակոծում է խաղաղ բնակչությանը՝ որպես թիրախ ընտրելով նույնիսկ հարսանեկան արարողությունը, որի արդյունքում խաղաղ քաղաքացիներ են տուժել:
Ալիևը ցավով նշել է, որ միջազգային հանրությունը, մասնավորապես, միջնորդները, ադեկվատ արձագանք չեն ցուցաբերում նման ագրեսիվ գործողություններին:
Ադրբեջանական ԶԼՄ-ները նշում են նաև, որ ԵԱՀԿ ՄԽ համանախագահների հետ Ալիևը քննարկել է Ղարաբաղյան կոնֆլիկտի կարգավորման հեռանկարները:
Թարգմանիչ՝ Քրիստինե Պողոսյան
.gif)
