Բաշկիրիայում հայերի վրա կրակ բացած անձանց նկարահանել են տեսախցիկները (տեսանյութ)

Բաշկիրիայում 7 հայի վրա կրակ բացած անձինք եղել են 8-ը, նրանց նկարահանել են տեսահսկման տեսախցիկները. գրում է Lifenews-ը` հրապարակելով տեսանյութը:

Տեսագրությունում երևում է, թե ինչպես է ժամը 02:44-ի սահմաններում «Հյուսիս» բազայի տարածք, որտեղ գտնվում է ավտոսրահը, մոտենում մեքենան, դարպասներով ներս են մտնում մարդիկ ու առանց շտապելու շարժվում դեպի ավտոսրահ: Նրանք կրում են սև հագուստ ու գլխարկներ: Նրանցից մեկի ձեռքին ատրճանակ հիշեցնող իր է եղել: Նրանք անցնում են տեսահսկման տեսախցիկների կողքով և 6 րոպե անց կրկին հայտնվում օբյեկտիվում, սակայն այս անգամ նրանք արդեն վազում են բազայի տարածքից: Դատելով ձայնագրությունում ֆիքսված ժամից` հանցագործություն իրականացնելու համար նրանցից շուրջ 5 րոպե է պահանջվել:

Հիշեցնենք` Բաշկիրիայի Սալավատե քաղաքում դիմակավորված անհայտ անձինք երեկ  գիշեր մոտեցել են Հյուսիսային փողոցի վրա գտնվող ավտոսրահին ու կրակ բացել 7 հայի վրա: