Ազգային ժողովում ՀՀ 2016 թ. պետական բյուջեի նախագծի քննարկման ժամանակ պատգամավոները մտահոգություն հայտնեցին, որ քննարկմանը չի ներկայացել ՀՀ մարդու իրավունքների պաշտպան Կարեն Անդրեասյանը:
ԱԺ մարդու իրավունքների պաշտպանության և հանրային հարցերի մշտական հանձնաժողովի անդամ Ալեքսանդր Արզումանյանը, դիմելով ՄԻՊ գրասենյակի աշխատակազմի ղեկավար Տիգրան Արեյանին, նշեց, որ բյուջեի քննարկումների ընթացքում Ազգային ժողով պետք է ներկայանա համապատասխան գերատեսչության ղեկավարը:
«Մենք կարևորում ենք, որպեսզի նման կարևոր քննարկումներին ներկայանա Մարդու իրավունքների պաշտպանը: Սա օրիորդաց վարժարան չէ, որ ինչոր բանից նեղանան և չգան: Ես խնդրում եմ փոխանցեք, որ տարվա մեջ այդ երեք անգամը, որ Մարդու իրավունքների պաշտպանը պետք է ներկայանա, Ազգային ժողով, թող ինքն անձամբ գա: Հակառակ դեպքում, ստացվում է, որ դուք չեք հարգում Ազգային ժողովը», -ասաց Արզումանյանը:
Ալեքսանդր Արզումանյանի մտահոգությանը միացավ նաև ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Էլինար Վարդանյանը: «Ես պետք է ասեմ, որ նիստից առաջ մենք համաձայնություն ձեռք չենք բերել, որ Կարեն Անդրեասյանն այս նիստին չի մասնակցելու: Մենք պահանջում ենք հարգանք Ազգային ժողովի նկատմամբ, և դա վերաբերում է բոլոր գերատեսչությունների ղեկավարներին», -եզրափակեց Վարդանյանը:
ՀՀ մարդու իրավունքների պաշտպանի գրասենյակի աշխատակազմի ղեկավար Տիգրան Արեյանը պատասխանեց, որ քննարկմանը ինքն է ներկայացել, քանի որ քննարկվելու են ֆինանսատնտեսական հարցեր:
.gif)
