Ընդդիմադիրից մինչև ԱԺ-ում Սերժ Սարգսյանի ներկայացուցիչ. ինչո՞ւ է Վիկտոր Դալաքյանը որոշել կուսակցություն ստեղծել (տեսանյութ)

Որքան մոտենում են 2017 թվականի խորհրդարանական ընտրությունները, այնքան քաղաքական ուժերի քաղաքական ախորժակը բացվում է: Միաժամանակ քաղաքական արենայում հայտնվում են մարդիկ, որոնք ձգտում են նոր քաղաքական ուժի ձեւավորմամբ ուղի հարթել, եւ դարձյալ սկսվել է նոր կուսակցություն բացելու մրցարշավը: Հերթական կուսակցության կենտրոնական գրասենյակն արդեն նորոգվում է: «Ժողովուրդ»-ին տեղեկություններ հասան այն մասին, որ ՀՀ Ազգային ժողովում ՀՀ նախագահի մշտական ներկայացուցիչ Վիկտոր Դալլաքյանն առաջիկայում պատրաստվում է կուսակցություն հիմնել, սակայն վերջինս դեռ չի շտապում բարձրաձայնել այդ մասին:

«Ժողովուրդ»-ի տեսախցիկը ֆիքսեց նաեւ նորաստեղծ կուսակցության կենտրոնական գրասենյակի վայրն ու այնտեղ արդեն իսկ կատարվող շինարարական աշխատանքները: Նկատենք, որ Հանրապետության 39 հասցեում տեղակայված կուսակացության գրասենյակի վերանորոգման աշխատանքները վերահսկում է հենց Վիկտոր Դալլաքյանի մորաքրոջ տղան: Այն գտնվում է ԲՀԿ-ի նոր գրասենյակի հարեւանությամբ:

Ինչո՞ւ է որոշել կուսակցություն հիմնել: «Ժողովուրդ»-ը զրուցեց ՀՀ Ազգային ժողովում ՀՀ նախագահի մշտական ներկայացուցիչ Վիկտոր Դալլաքյանի հետ՝ պարզելու իր կողմից ստեղծվելիք կուսակցության նպատակները: Սակայն, ի զարմանս մեզ, Դալլաքյանը վստահեցրեց, որ այս տեղեկությունը չի համապատասխանում իրականությանը, եւ որ ինքն այդպիսի մտադրություններ չունի:

Թե որն է Դալլաքյանի կողմից կուսակցության ստեղծման լուրը գաղտնի պահելու պատճառը, դժվար չէ ասել: Վերջինս լինելով քաղակական դաշտի հնաբնակներից մեկը՝ լավ գիտի «ֆալշ ստարտ»-ի կարեւորությունը, ու թերեւս դրանով է պայմանավորված, որ դեռեւս նպատակահարմար չի գտնում այդ մասին բարձրաձայնել:

Մանրամասները`  ArmLur.am-ի տեսանյութում

Արփինե Թովմասյան, Հովսեփ Հովսեփյան, Նարեկ Սարգսյան