ՀՖՖ-ն կայացրել է Փյունիկ-Ալաշկերտ հանդիպման մրցավարների վերաբերյալ վճիռը

Երևանի «Փյունիկը» բողոք էր ներկայացրել ՀՖՖ 3-րդ տուրի՝ «Ալաշկերտի» հետ խաղի ընթացքում վիճելի դրվագի վերաբերյալ:

ՀՖՖ-ից ստացվել է բողոքի պատասխանը.

«ՀՖՖ մրցավարական կոմիտեն 15.08.2016թ-ին կայացած նիստում քննարկել է սույն թվականի օգոստոսի 13-ին կայացած Բարձրագույն խմբի «Փյունիկ»- «Ալաշկերտ» խաղի մրցավարությունը, այդ թվում նաև 59-րդ րոպեին կայացած դրվագը:

Տեսուչ Ա. Հարությունյանը նշել էր, որ խաղի ընթացքում մրցավարական անձնակազմի կողմից կայացվել են սխալ որոշումներ, ներառյալ՝ բողոքում նշված խաղային դրվագում մրցավարի օգնական Մ. Ղազարյանի կողմից սխալ արձանագրված խաղից դուրս դիրքը, որի արդյունքում չի արձանագրվել «Փյունիկ» թիմի կողմից խփած ճիշտ գոլը:

Սխալ որոշումներ կայացրած մրցավարական անձնակազմի անդամներին՝ մրցավար Արտակ Սիմոնյանին, եզրայիններ Մեսրոպ Ղազարյանին և Վանիկ Սիմոնյանին տեսուչ Ա. Հարությունյանը գնահատել է անբավարար:

Դիտելով խաղի վիճահարույց դրվագները՝ ՄԿ անդամները համաձայնել են տեսուչի որոշման հետ:

Հայտնում ենք, որ ՄԿ-ն սխալ որոշումներ կայացրած մրցավարական անձնակազմի երեք անդամներին տույժի է ենթարկել` որակազրկելով նրանց երեք տուրով՝ համաձայն մրցավարների և տեսուչների պատասխանատվության մասին կանոնակարգի»:

«Փյունիկ» – «Ալաշկերտ» հանդիպման մրցավարը եղել է Արտակ Սիմոնյանը, եզրերում նրան օգնել են Վանիկ Սիմոնյանն ու Մեսրոպ Ղազարյանը, լրացուցիչ օգնականներն են եղել Զավեն Հովհաննիսյանն ու Էրիկ Գալստյանը: