«Հիմա բոլոր ստուգումներին պետք է ասեն` քաղաքական հետապնդո՞ւմ». իշխանություն-ԲՀԿ փոխհրաձգությունը շարունակվում է

«Ժողովուրդ» օրաթերթի տեղեկությունների համաձայն` վերջին օրերին լարված իրավիճակ է ԱԺ ԲՀԿ խմբակցությունում: Բանն այն է, որ վերջին օրերին սրվել են իշխանությունների եւ ԲՀԿ-ականների հարաբերությունները, քանի որ ԱԺ ԲՀԿ խմբակցության ղեկավար Գագիկ Ծառուկյանը Երեւանի քաղաքապետ Հայկ Մարությանի աշխատանքը քննադատել էր` հայտարարելով, թե ներդրողների համար պայմաններ չի ստեղծում:

Ըստ մեր տեղեկությունների` փոխհարաբերությունները լարվել են նաեւ այն բանից հետո, երբ նախորդ շաբաթ ԱԺ ԲՀԿ խմբակցության անդամները դեմ քվեարկեցին իշխանությունների կողմից աննախադեպ որակված 2020 թվականի բյուջեի նախագծին:

Հիշեցնենք, որ «Ժողովուրդ» օրաթերթը դեռեւս դեկտեմբերի 7-ին գրել էր, որ իշխանությունները սկսել են ուսումնասիրել եւ վերհանել Գագիկ Ծառուկյանին եւ նրա ընտանիքին պատկանող բոլոր գույքերի (շենք-շինություններ) մասին տեղեկությունները` սկսած 2002 թվականից, որպեսզի ստուգեն, թե որքանով են դրանք օրինական կառուցվել, իսկ «Օլիմպավան» ընկերության հետ կապված` քաղաքապետարանի աշխատողներն արդեն խնդիրներ գտել են:

Երեկ «Ժողովուրդ» օրաթերթը զրուցել է ԱԺ «Իմ քայլը» խմբակցության պատգամավոր Հրաչյա Հակոբյանի հետ՝ պարզելու համար, թե ինչու են քաղաքական ճնշումներ սկսել գործադրել ընդդիմադիր ուժերի վրա:

-Որեւէ քաղաքական ճնշում չկա. ո՞վ է տեսել, որ Գագիկ Ծառուկյանի նկատմամբ քաղաքական հետապնդում է իրականացվում: Կարծում եմ, որ որեւէ մեկը նման բան նկատած չի լինի, որեւէ մեկը չի կարող ասել, որ ինչ-որ անակնկալ ստուգումներ են սկսել իրականացվել:

-Արդեն որոշում կա ուսումնասիրել Գ. Ծառուկյանի «Օլիմպավան» ընկերությունը, քաղաքապետարանի աշխատակիցներն էլ հանձնարարություն են ստացել 2002 թվականից սկսած` բոլոր փաստաթղթերն ուսումնասիրել, որոնք կապված է Գ. Ծառուկյանի ընկերությունների հետ: Ինչո՞ւ նոր նման որոշում կայացվեց, դա ճնշում չէ՞ իշխանություններին հակադարձելու համար:

-Չեմ կարծում` դա քաղաքական հետապնդում լինի: Զուտ գնահատականներ է տվել, որ սա չի թույլատրվում, նա չի թույլատրվում, Երեւանի քաղաքապետն էլ հակադարձել է, որ, ասենք, այսինչ թույլտվությունը ոչ թե ես թույլ չեմ տալիս, այլ դատարանում է, այդտեղ ես որեւէ քաղաքական հետապնդում չեմ տեսնում: Դրանք գնահատականներ են, որոնք ամեն մեկն իրենն է ներկայացրել:

Հիմա ինչ ստուգումներ իրականացվեն, պետք է ասեն` քաղաքական հետապնդո՞ւմ է իրականցվում: Չէ, հավատացե՛ք, դրանք նորմալ պրոցեսներ են, որոնք իրականացում են համապատասխան մարմինները:

-ԲՀԿ-ի ու իշխանությունների փոխհարաբերություններ, կարծես թե, ավելի են լարվել 2020 թվականի բյուջեի քվեարկությունից հետո, երբ վերջիններս մեկ մարդու նման դեմ քվեարկեցին նախագծին: Դա նպաստե՞լ է ընդդիմության հետ լարվածությանը:

-Չէ, իհարկե, նման բան չկա, պարզապես նրանք խոսում են շեյխերի որդիների ներդրումներից, հետո ասում են` քաղաքապետը թույլ չտվեց, այս իշխանությունները ներդրումներ չեն ապահովում, դա սխալ է: Քաղաքապետն ի ցույց դրեց, թե իրականությունը որն է: Բոլորի մոտ էլ ստուգումներ լինում են, ուղղակի երբ ինչպես պետք է լինում, այդպես էլ ներկայացվում է, մեկ ասում են` նորմալ եկան, ստուգեցին, գնացին, մեկ էլ կարողա հայտարարեն, թե սա քաղաքական հետապնդում է:

-Բայց, կարծես թե, ՀՅԴ-ի վրա էլ իշխանությունները ճնշումներ սկսեցին գործադրել, երբ վերջիններս համարձակվեցին պահանջել ԿԳՄՍ նախարար Արայիկ Հարությունյանի հրաժարականը:

-«Դաշնակցությանն» արդեն ճնշել վերջացրել է մեր ժողովուրդը, իշխանությունն էլ ո՞ւր ճնշի, տեղով ճնշված է: Ես նման տեղեկություն չունեմ, որ իշխանությունները ճնշում են ՀՅԴ-ականներին: Ու ասում են, թե իշխանությունները փորձում են ինչ-որ քաղաքական ուժերի ճնշել, բայց Դուք երբեւէ տեսե՞լ եք` ճնշենք մենք: ՀՀԿ-ն էլ է ասում, որ ճնշում ենք, ինչո՞վ ենք ճնշում:

Մենք 100-ամյա կուսակցությունների ու մյուսների աշխատանքներին չենք միջամտում, ճնշումների չենք ենթարկում, մենք ունենք մեր աշխատանքային քարտեզը, մենք աշխատում ենք: Ասեմ` իմանաք, որ շատ վաղուց կար այն խոսակցությունը, որ ՀՅԴ-ի ներսում կար այդ թեւերի բաժանումը, ու միգուցե դրա հետեւանքն է եղել այն, ինչի մասին հայտարարել են: Դա բերել կապել իշխանությունների հետ, ասել, որ դրան միջամտել ենք մենք, կազմակերպել են իշխանությունները, հավատացե՛ք, անլուրջ է:

Իրենք իրենց ներսում հասկացան, որ պետք չի պահանջել նախարարի հրաժարական, իրենք իրենց ներսում խնդիր ունեն, հավատացե՛ք, որ նման բաներին իշխանությունները չեն կարող միջամտել: Մենք ճնշումների չենք ենթարկում որեւէ մեկին, մենք չենք միջամտում որեւէ քաղաքական կուսակցության աշխատանքներին: Մենք ունենք մեր գործառույթները, որոնք կատարում ենք: Հավատացե՛ք:

Զրուցեց ՍՈՆԱ ԳՐԻԳՈՐՅԱՆԸ