Ֆիզուլիում զոհված տանկիստը մինչև զոհվելը սպառել է տանկի զինանոցում եղած արկերը

Նախկինում տեղեկացրել ենք, որ դիլիջանցի ժամկետային զինծառայող Վլադիմիր Ալիխանյանը ապրիլի սկզբին զոհվել է Արցախի պաշտպանական մարտերում: Մի քանի օր  նրա ծնողները, հարազատները այդ մասին լուր չունեին եւ տանջագին  ապրումների մեջ էին: Ցավն ու անորոշությունն  էր տիրում Դիլիջան քաղաքում:  Դիլիջանից տեղեկացա, որ  ժամկետային զինծառայող, 20-ամյա Վլադիմիր Վարուժանի  Ալիխանյանի դին ապրիլի 7-ի երեկոյան Դիլիջան քաղաք է բերվել: Նրա  հոգեհանգիստը կկայանա ապրիլի 8-ի երեկոյան, հուղարկավորությունը՝ ապրիլի 9-ին:  Վ. Ալիխանյանը  զորակոչվել է  2014թ. գարնանը, 2 ամսից պետք է  զորացրվեր: Երիտասարդն ամուսնացած չէր:

Շարքային Վլադիմիր Ալիխանյանը  հետմահու պարգեւատրվել է Լեռնային Ղարաբաղի հանրապետության «Արիության համար» մեդալով:  Նա տանկիստ էր, տանկային  այդ անձնակազմը լավագույններից է եղել, բազմիս արժանացել հրամանատարության խրախուսանքներին: Դիլիջան քաղաքից  հայտնեցին, որ տանկը  հերոսական պայքարի մեջ է մտել, հակառակորդին մեծ  վնասներ հասցրել, մինչեւ խոցվելը գրեթե սպառել տանկի  զինանոցում եղած արկերը: Վ. Ալիխանյանի ընտանիքը  բնակվում է Դիլիջան քաղաքի Թախտա թաղամասում գտնվող սեփական առանձնատանը, Վ. Ալիխանյանն ունի ծնողներ, եղբայրը 12-րդ դասարանում է սովորում:

Ոսկան Սարգսյան

Տավուշ