Կադաստրի նախկին պետը ավազակային հարձակման է ենթարկվել

Վանաձորի կադաստրի նախկին պետը ` Գերասիմ Անդրեասյանը,  մարտի 26-ին Լոռու մարզի Դարպաս գյուղում ավազակային հարձակման է ենթարկվել: 

Այս մասին Armlur.am-ին հայտնեցին ոստիկանության լրատվական ծառայությունից, որտեղից տեղեկացրին նաև, որ հարուցվել է քրեական գործ՝  ՀՀ քր.օր.-ի 175 հոդվածի 2-րդ մասի (ավազակային հարձակումը, որը կատարվել է մի խումբ անձանց կողմից) հատկանիշներով:

Ինչպես Armlur.am-ին հայտնեց Վանաձոր Բ/Կ-ի բժիշկ Քարամյանը, այսօր Գերասիմ Անդրեասյանին տեղափոխել են Երևան, չնայած, որ վերջինիս կյանքին վտանգ չի սպառնում: «Անդրեասյանին իրենց կամքով են Երևան տեղափոխել: Նա իրեն շատ լավ էր զգում, ոտքի վրա էր: Ոչ մի անձնական հարց չի եղել, ուղղակի պայմանների հետ էր կապված: Մենք ինչ պետք ա արել ենք ` տնավարի, ակուրատնի»,- ասաց բժիշկը:

Իսկ Դարպասի գյուղապետ Սամվել Ավետյանի հավաստմամբ `  իրենց գյուղացիներից ոչ ոք չէր կարող մասնակից լինել ավազակային հարձակմանը:

«Դա բացառվում ա: Անդրեասյանն ընդհամենը թեթև դաչա ունի Դարպասում` ամառանոցի նման մի բան, որ գալիս-հանգստանում ա: Մենք էտ մարդուն հարգում ենք: Ինքը պարկեշտ, օրինակելի մարդ ա: Մեր ընդհանուր համայնքը գոհ ա իրա բարեհամբույր վերաբերմունքից»,- ասաց գյուղապետը `  հավելելով, որ Անդրեասյանը Վանաձորի բնակիչ է, իսկ Դարպասում չկա որևէ մեկը, ում հնարավոր կլիներ հարձակման մեջ կասկածել:

Իսկ Վանաձորի քաղաքապետ Սամվել Դարբինյանն Armlur.am-ին հայտնեց, որ ինքը դեպքի մասին իմացել է համացանցից, և մանրամասներ չգիտի, քանի որ առանձնապես մտերիմ հարաբերությունների մեջ չի եղել Անդրեասյանի հետ: Քաղաքապետը հայտնեց նաև, որ այս պահին Գերասիմ Անդրեասյանը չի աշխատում և զբաղվում է ինչ որ բիզնեսներով:

Նշենք նաև, որ ոստիկանության Լոռու մարզային վարչությանը հայտնի է դարձել, որ մի քանի անհայտ անձինք կպչուն ժապավենով կապել են Անդրեասյանի ձեռքերն ու բերանը, այնուհետև ՝  ծեծի ենթարկելով ՝ նրանից պահանջել և ստացել են իր մոտ եղած 4,700 ԱՄՆ դոլարը, և սպառնացել ու պահանջել են, որ հաջորդ օրը ՝  առավոտյան, պետք է ևս 70 հազար ԱՄՆ դոլար թողնի տան մուտքի մոտ, որպեսզի իրենք վերցնեն այն:

Տաթև Հարությունյան