ԳՈՒՑԵ ՍԵՐԺ ՍԱՐԳՍՅԱՆՆ ԷԼ ՈՒՇԱՆԱ, ԻՆՉՊԵՍ ՄՈՒԲԱՐԱՔԸ

Վերջին օրերին իշխանության բավական աշխույժ քաղաքական հռետորաբանությունը` կսատարի Ծառուկյանը Սարգսյանին, թե ոչ, կամ տնտեսական ծրագրերը` Իրան-Հայաստան նավթամթերքներ տեղափոխող խողովակաշարի կառուցում, «Մարս» գործարանում ազատ տնտեսական գոտու ստեղծում եւ այլն, թերեւս   սարքված են քողարկելու  առաջին անհրաժեշտության  ապրանքների թանկացման հետեւանքները: Գրեթե ամեն օր  թանկանում է 1 պարկ ալյուրի գինը: Իսկ Հայաստանի պես  երկրում, որտեղ  շատ ընտանիքներ սովից չեն մահանում, քանի որ գոնե  հաց են ուտում (պանիրն էլ վերջերս դելիկատես դարձավ), դա դուր չէր գալիս հայրենի իշխանությանը: Ինչպես միշտ կառավարությունը ձեռքերը պարզում է վեր, թե մենք ինչ անենք` աշխարհում ցորենը թանկացել է: «Հայլուրը»  ռեպորտաժներ է ցուցադրում  Չիկագոյի, Լոնդոնի, էլ չգիտես  որտեղի բորսաներից` համոզելու հայաստանյան հանրությանը, որ խեղճ իշխանությունները «այս թեմայի մեջ չկան»: Համաշխարհային  շուկաներում վերջին մեկ ամսում  նկատվեց ցորենի գնի որոշակի աճ, սակայն Հայաստանում այդ  ապրանքի թանկացման իր լուման ներդրեց նաեւ Պետական եկամուտների կոմիտեն`  իր տխրահռչակ հսկիչ գներով: Մինչեւ փետրվարի 1-ը ցորենի հսկիչ գինը 250 դոլար էր, իսկ այժմ` 350 դոլար: Փաստացի, ՊԵԿ-ը իր այս քայլով յուրաքանչյուր տոննա ալյուրի գինը բարձրացրել է 30 դոլարով: Թերեւս, երբ Էկոնոմիկայի նախարարը ասում էր, որ գնաճը զսպելու համար կառավարությունը կօգտագործի «ամբողջ  գործիքակազմը», նկատի ուներ հսկիչ գնի բարձրացումը: Կարելի է միայն կռահել եւ սարսափած  սպասել, թե «ամբողջ գործիքակազմի»  կիրառման դեպքում  ինչ նոր  անակնկալներ են մեզ սպասում: Հատկանշական է, որ ալյուրի գնի բարձրացումը համընկավ  այդ ապրանքի ներմուծման մեջ բացարձակ գերիշխող դիրք գրավող` ԱԺ պատգամավոր Սամվել Ալեքսանյանին պատկանող ձեռնարկություններում հարկային ծառայության կողմից ստուգումներ անցկացնելու հետ: Կառավարությունը իր գործունեությամբ ժողովրդին ստիպելու է հանրահավաքներ կազմակերպել`  ի պաշտպանություն Սամվել Ալեքսանյանի, քանզի վերջինիս  ձեռնարկություններում  հարկային ստուգումները անպայման անդրադառնում են մարդկանց կենսամակարդակի վրա: Պետք է  պահանջել ՊԵԿ-ից  եւ Տնտեսական մրցակցության  պաշտպանության  պետական հանձնաժողովից`  մոռանալ պատգամավոր օլիգարխի գոյության մասին:  Թեպետ այս իշխանության գործելաոճն  է` «ունքի տեղը աչքը հանելը»:  Երբեմն տպավորություն է ստեղծվում, որ առկա  վիճակից դժգոհ են նաեւ իշխանությունները, եւ տեսնելով  ժողովրդի պասիվությունը` իրենք  են քայլեր  ձեռնարկում սոցիալական  բունտը արագացնելու համար: Հիշեցնենք, որ Թունիսում եւ Եգիպտոսում տեղի ունեցած հեղափոխություններում իրենց  ներդրումն   ունեցան նաեւ հացի թանկացումները:  Ու  երբ տեղի իշխանությունները փորձեցին  իջեցնել հացի եւ առաջին անհրաժեշտության այլ ապրանքների գները (փաստորեն, նման հնարավորություն կար), արդեն ուշ էր: Այնպես որ, չի բացառվում, որ Սերժ Սարգսյանն էլ ուշանա:ԱՐԻՍ ՎԱՂԱՐՇԱԿՅԱՆ