ՀԱՊԿ արտաքին գործերի նախարարների խորհրդի նիստի արդյունքներով Լեռնային Ղարաբաղի հակամարտության վերաբերյալ հայտարարություն է ընդունվել: ՀԱՊԿ ԱԳ նախարարների խորհրդի նիստից հետո լրագրողների հետ հանդիպմանն այս մասին հայտնեց ՀՀ ԱԳ նախարար Էդվարդ Նալբանդյանը:
«Նիստի ընթացքում մենք ընդունել ենք հայտարարություն ղարաբաղյան և սիրիական հակամարտությունների վերաբերյալ», «Արմենպրես»ի հաղորդմամբ՝ նշեց Նալբանդյանը: ՀԱՊԿ գլխավոր քարտուղար Նիկոլայ Բորդյուժան ևս ընդգծեց, որ նիստի ընթացքում ուշադրություն է հատկացվել միջազգային անվտանգության թեմային, հատկապես կարևորվել է կովկասյան տարածաշրջանում Լեռնային Ղարաբաղի հակամարտության հարցը, որի վերաբերյալ ընդունվել է հայտարարություն:
Հայտարարության մեջ ասվում է.
«Աջակցություն ենք հայտնում մայիսի 16-ին Վիեննայում և հունիսի 20-ին Սանկտ Պետերբուրգում Լեռնային Ղարաբաղի հիմնախնդրի վերաբերյալ տեղի ունեցած գագաթաժողովներին ձեռք բերված պայմանավորվածություններին՝ ուղղված հակամարտության գոտում իրավիճակի սրման կանխարգելմանը, իրադրության կայունացմանը և խաղաղ բանակցային գործընթացի առաջ մղման համար պայմանների ստեղծմանը:
Հաստատելով Լեռնային Ղարաբաղի հիմնախնդրի բացառապես խաղաղ կարգավորման անհրաժեշտությունը՝ աջակցություն ենք հայտնում ԵԱՀԿ Մինսկի խմբի համանախագահների ջանքերին՝ ուղղված հակամարտության կարգավորմանը` միջազգային իրավունքի նորմերի, ՄԱԿ-ի կանոնադրության, Հելսինկյան եզրափակիչ ակտի դրույթների, մասնավորապես` ուժի կամ ուժի սպառնալիքի չկիրառման, պետությունների տարածքային ամբողջականության, իրավահավասարության և ժողովուրդների ինքնորոշման իրավունքի հիման վրա»:
Հայաստանի Հանրապետության արտաքին գործերի նախարար
Բելառուսի Հանրապետության արտաքին գործերի նախարար
Ղազախստանի Հանրապետության արտաքին գործերի նախարար
Ղրղզական Հանրապետություն արտաքին գործերի նախարար
Ռուսաստանի Դաշնության արտաքին գործերի նախարար
Տաջիկստանի Հանրապետության արտաքին գործերի նախարար
.gif)
