ՌԴ Ցամաքային զորքերը կստանան 400-ից ավելի տանկ, զրահափոխադրիչ եւ հետեւազորի մարտական մեքենա

ՌԴ Ցամաքային զորքերը 2022 թվականին կստանան 400-ից ավելի տանկեր, զրահափոխադրիչներ եւ հետեւազորի մարտական մեքենաներ: Այդ մասին, ինչպես տեղեկացնում Է «Արմենպրես»-ը, հաղորդել են Ռուսաստանի պաշտպանության նախարարության տեղեկատվության եւ զանգվածային հաղորդակցությունների դեպարտամենտում:

«Ռուսաստանի Դաշնության զինված ուժերի Ցամաքային զորքերը 2022 թվականին կստանա ավելի քան 400 միավոր զրահատանկային տեխնիկա»,-հայտարարել են ՌԴ պաշտպանության նախարարությունում: Այնտեղ նշել են, որ խոսքը ժամանակակից եւ արդիականացված նմուշների մասին Է, որոնք «իրենց հաջողությամբ են դրսեւորել տարբեր կլիմայական գոտիներում շահագործելիս»:

«Ցամաքային զորքերը կստանան Տ-72ԲԶՄ, Տ-80ԲՎՄ, Տ-90Մ ժամանակակից տանկեր, ԲՄՊ-3 հետեւազորի մարտական մեքենաներ, արդիականացված ԲՄՊ-2, ինչպես նաեւ ԲՏՌ-82Ա զրահափոխադրիչներ»,-ասվում Է հաղորդագրության մեջ:

2018 թվականին Յուրի Բորիսովը, լինելով ՌԴ պաշտպանության նախարարի տեղակալ (ներկայում փոխվարչապետ), հայտարարել Է, որ ՌԴ պաշտպանության նախարարությունը մտադիր Է տարեկան մոտավորապես 200 տանկ գնել, հաղորդել Է «Ինտերֆաքս»-ը: