ՀԱՐՑ. Քույրս հիվանդ է եւ պետք է ռենտգենյան ճառագայթ ընդունի, որը ՀՀ-ում չկա: Ուռուցքաբանական ինստիտուտից տեղեկացա, որ այդ բուժծառայությունը մատուցվում է Մոսկվայում: Արդյո՞ք պետպատվերի շրջանակներում հնարավոր է դա իրականացնել: Առողջապահության նախարարությունը որեւէ կերպ կարո՞ղ է աջակցել հիվանդին: Նշեմ, որ քույրս բնակվում է սահմանամերձ գյուղում եւ երկար տարիներ աշխատել է որպես մանկավարժ: Խնդրում եմ Ձեր խորհրդատվությամբ օգնել նրան:

ՊԱՏԱՍԽԱՆ. Հենրիկ Զաքարյանի հարցմանն ի պատասխան՝ ՀՀ առողջապահության նախարարությունը ներկայացնում է հետեւյալ տեղեկատվությունը.
Հայաստանի Հանրապետության հիվանդ քաղաքացիների բուժումը ՀՀ սահմաններից դուրս՝ ԱՊՀ երկրների շրջանակներում, կազմակերպվում է ՀՀ կառավարության 04.03.2004թ. «Պետության կողմից երաշխավորված անվճար բժշկական օգնության եւ սպասարկման մասին» թիվ 348-Ն որոշման եւ ՀՀ առողջապահության նախարարի 2012թ. հունվարի 17-ի «Պետության կողմից երաշխավորված անվճար բժշկական օգնության եւ սպասարկման մասին» N 318-Ն որոշման հավելված 1-ով սահմանված «Բնակչության սոցիալապես անապահով ու առանձին (հատուկ) խմբերի ցանկում ընդգրկված քաղաքացիների ՀՀ-ից դուրս բուժման ուղեգրման եւ ճանապարհածախսի փոխհատուցման չափորոշիչը հաստատելու մասին» թիվ 30-Ա հրամանի համաձայն: Ըստ այդմ՝ հիվանդին եւ ուղեկցողին տրամադրվում են օդանավի (մեկնումի եւ վերադարձի) տոմսեր՝ առանց տվյալ երկրում բուժման ծախսերի փոխհատուցման:

«ԺՈՂՈՎՈՒՐԴ». ՀՀ առողջապահության նախարարության պատասխանից հասկանալի է, որ խմբագրություն դիմած հիվանդի հարազատները ստիպված են լինելու բուժման կուրսի ընդունման համար գումար հայթայթել, որովհետեւ պետությունը չի պատրաստվում ֆինանսավորել իր հիվանդ քաղաքացիների բուժումը: Իսկ օդանավերի տոմսերի տրամադրվող գումարը կազմում է բուժման համար անհրաժեշտ գումարի չնչին մասը: