Վարչապետը չի՞ հերքել լուրերը, որ լարված են իր հարաբերությունները նախարարների հետ

Վարչապետ Կարեն Կարապետյանը, որ «Խոսրովի անտառ» պետական արգելոցի հրդեհի օրերին աշխատում էր զերծ մնալ այդ թեմայով խոսելուց, «Բազե» երիտասարդական հավաքի ժամանակ վերջապես անդրադարձել է կատարվածին, ընդ որում, բավական ուշագրավ շեշադրումներով:

Հարցին, թե ըստ մամուլի հրապարակումների, հրդեհից հետո լարվել են վարչապետի եւ ՀՀ արտակարգ իրավիճակների եւ ՀՀ բնապահպանության նախարարների հարաբերությունները, հետեւաբար արդյո՞ք քննարկվել է նախարարների հետագա պաշտոնավարման հարցը, Կարապետյանն ասել է. «Մենք դեռ վերլուծություն չենք արել: Աղետ լինելուց հետո անմիջապես պետք է նախարա՞ր փոխել:

Դեռ մեր թույլ ու ուժեղ կողմերը չենք վերլուծել, մեր անձնակազմը, կառավարիչներն ինչպես են արձագանքել, պատրա՞ստ են եղել, թե՞ ոչ` անկախ բնապահպանության ոլորտը կլինի, թե արտակարգ իրավիճակների»: Իսկ դիտարկմանը, թե ապրիլյան պատերազմը ցույց տվեց ռազմաարդյունաբերության ոլորտում բացթողումները, Խոսրովի արգելոցի հրդե՞հն ինչ ցույց տվեց, վարչապետը կրկնել է նույն միտքը, թե դեռ վերլուծություն չեն արել:

Նախ՝ արձանագրենք, որ Կարեն Կարապետյանը չի հերքել, որ լարված են իր ու երկու նախարարների՝ Դավիթ Տոնոյանի եւ Արծվիկ Մինասյանի հարաբերությունները, այդպես անուղղակի հաստատելով շրջանառվող լուրերը /առավել եւս, հիշեցնենք, հրդեհի օրերին վարչապետն իրեն ցուցադրաբար «ետ էր քաշվել», հեռու էր պահում միջադեպից, գերադասելով մեկնել Արցախ ու սկուտեր վարել/:

Ինչ վերաբերում է միջադեպին, ապա Խոսրովի անտառի հրդեհից անցել է տասը օր, եւ այս ընթացքում դեռ որեւէ պաշտոնանկություն չի եղել, ասել է, թե՝ որեւէ մեկը կատարվածի համար պատասխանատվություն չի կրել:

Այստեղ, իհարկե, պարտադիր չէ, որ պատասխանատվության առաջ կանգնեն հենց նախարարները, առավել եւս, երբ երկուսն էլ նորանշանակ են (չնայած՝ նորմալ երկրներում նախարարներն իրենք են հրաժարական տալիս): Բայց փաստ է, որ իշխանությունները պատրաստ չէին նման մասշտաբների հրդեհը հանգցնելու, եւ դեռ հայտնի չէ՝ ավելի զանգվածային արտակարգ իրավիճակների դեպքում ինչպե՞ս ենք դիմակայելու:

Ինչ վերաբերում է ուժեղ եւ թույլ կողմերին, ապա գոնե առաջին հայացքից պարզ է եւ այդ մասին արդեն բարձրաձայնել են հենց ոլորտի մասնագետները, որ չունեինք համապատասխան տեխնիկա: Հետեւաբար, հիմա առանջնային խնդիր է ԱԻՆ-ի գույքագրումն ու տեխնիկասարքավորումներով համալրելը: Ու այս առումով անհասկանալի է, թե դեռ որքա՞ն ժամանակ է անհրաժեշտ ակնհայտ իրողությունները հասկանալու համար: Այնպես որ, լավ կլիներ, եթե վարչապետը նման խնդիրներին ուշադրություն դարձներ, այլ ոչ թե զբաղվեր շոուներով:

ԱՐՄԱՆ ԳԱԼՈՅԱՆ