Ամռան տապին շատերը իրենց «մխիթարությունը» գտնում են ծովափներում: Ծովափ այցելելուց առաջ, սակայն, հարկավոր է լրջորեն պատրաստվել, քանի որ այն թելադրում է իր նորաձեւությունն ու իր կանոնները: Ծովափնյա նորաձեւության վերջին միտումների մասին «Ժողովուրդ» օրաթերթը զրուցել է ոճաբան Արայիկ Գաբաջյանի հետ: Նա խոսել է այն մասին, թե ինչ հագուստ եւ աքսեսուարներ կարելի է կրել արեւայրուքի, ծովափնյա փարթիների դեպքում: Ոճաբանն անդրադարձել է նաեւ եվրոպական քաղաքների ծովափներում տարածված տենդենցներին:
-Արայիկ, սկսենք լողազգեստներից: Ո՞ր մոդելներն են առավել ակտուալ եւ ո՞ր երանգներն են տարածված:
-Այս ամառ բավական մեծ տարածում ունեն վերեւամասն ու ներքեւամասը միմյանցից առանձին, ոչ կպած մոդելները, ընդ որում, դրանք կարող են էականորեն տարբերվել իրենց գույներով: Օրինակ՝ մոխրագույնը կարող է համադրված լինել կարմիրի հետ: Այսինքն՝ հակասող երանգները մոդայիկ են:
-Հավաքածուներում մեծ տարածում ունեն նաեւ խալաթ հիշեցնող ծովափնյա հագուստները: Կմանրամասնե՞ք՝ հատկապես ինչ տեսք ունեն դրանք:
-Այո՛, դրանց ոչ թափանցիկ, նուրբ, մետաքսյա, միագույն, գծավոր տեսակները շատ մոդայիկ են: Քիչ չեն նաեւ աչքի ընկնող պրինտերով, օրինակ՝ արմավենու տերեւներով մոդելները:
-Իսկ ի՞նչ հագնել ծովափնյա փարթիներին, երեկույթներին, որոնք հատուկ խորագիր չունեն:
-Այն երեկույթները, որոնք ունենում են խորագիր, նախապես ընտրվում է նաեւ համապատասխան դրեսկոդ: Իսկ մյուս դեպքերում խորհուրդ կտայի ուշադրություն դարձնել արեւայրուքին: Արեւայրուքի դեպքում ցանկալի է կրել բնական մատերիալից, նուրբ լողափնյա հագուստ: Եթե մաշկը մուգ շոկոլադե գույն ունի, ցանկալի է կրել վառ գույնի հագուստներ, իսկ եթե այն բաց է, վառ գույները չեն խրախուսվում:
-Ընդհանրապես, կա՞ սեզոն կամ տարի, երբ արեւայրուքը մոդայիկ չէ:
-Ո՛չ, այն միշտ է մոդայիկ, հատկապես ամառվա սեզոնին: Ձմռանն արեւայրուքը արհեստական շպարի տեսք ունի: Բացի այդ՝ առաջին տոնից չի կարելի միանգամից վեցերորդ տոնին անցում կատարել: Դա ոչ միայն վնասակար է առողջությանը, այլեւ գեղեցիկ չէ:
-Իսկ ծովափնյա կոշիկների մասին ի՞նչ կասեք:
-Եվրոպական քաղաքների ծովափներում, օրինակ, նորաձեւ են տափակ եւ լողավազանի համար նախատեսված սանդալները, որոնք լրացված են հյուսված կտորներով, մորթիներով: Իսկ վայրի ծովափերի համար «մատով», կաուչուկի մատերիալից, կիսաթափանցիկ սանդալներն են ակտուալ:
-Գլխարկների, գլխաշորերի մասով ի՞նչ նորություններ է բերել այս սեզոնը:
-Նորաձեւ են այն գլխաշորերը, որոնք օգտագործվում են որպես աքսեսուար: Խոսքը չալմաների մասին է: Իսկ գլխարկները «ժառանգել ենք» անցած սեզոնից: Մոդայիկ են դասական, լայնեզր մոդելները:
-Ակնոցներից կարծես թե մեծ տարածում ունեն մեծ, կլորավուն տարբերակները՝ թափանցիկ ապակիներով:
-Այո՛, դրանք արեւից քիչ են պաշտպանում, ավելի շատ որպես աքսեսուար են ծառայում: Այդպիսի ակնոց կարելի է կրել ե՛ւ ցերեկը, ե՛ւ երեկոյան:
-Մի փոքր էլ ծովափնյա պայուսակներից խոսենք: Ո՞ր տեսակներն են մոդայիկ:
-Նորաձեւ են աֆրիկյան ոճով, պլաստմասե մատերիալից գործված պայուսակները՝ երկար ծոփքերով: Ավանդական, ծղոտե պայուսակներն էլ ներկայացված են նորովի, առավել կատարելագործված: Դրանք համալրված են կտորով եւ կաշվով:
-Խոսեցինք ծղոտից, կարծես թե ծղոտե հովհարները եւս ակտուալ են, այո՞:
-Այո՛, հատկապես եվրոպական ծովափներում, որտեղի դրեսկոդը տարբերվող է, քանի որ ծովափը մոտ է քաղաքին, ուստի պահպանված է ծովափնյա կուլտուրան: Ի դեպ, նախկինում ավելի քիչ էին հաճախում եվրոպական քաղաքների մերձակա ծովափներ, իսկ հիմա ոչ, քանի որ հաճախ մարդիկ համատեղում են աշխատանքը հանգստի հետ:
Զրուցեց ԱՆՆԱ ԲԱԲԱՋԱՆՅԱՆԸ
ԳԵՐԱԶԱՆՑ ԿԱԶՄ
Մադրիդի «Ռեալ»-ի նախագահ Ֆլորենտինո Պերեսը վստահեցրել է, որ պորտուգալացի Կրիշտիանու Ռոնալդուի հեռանալուց հետո թիմի կազմի թուլացում չի լինի, եւ առաջիկայում թիմ կգան հրաշալի ֆուտբոլիստներ:«Մեզ հայտնի է` ինչ են սպասում մեր թիմից յուրաքանչյուր մրցաշրջանում: «Ռեալ»-ը միշտ ցանկանում է ավելին: Սա հաղթողների թիմ է: Ունենք գերազանց կազմ, որը կուժեղացնենք հրաշալի ֆուտբոլիստներով»,- ասել է ակումբի նախագահը:
Այս տրանսֆերային պատուհանի ընթացքում «Ռեալ» են տեղափոխվել «Զարյա»-ի դարպասապահ Անդրեյ Լունինը, «Ֆլամենգո»-ի հարձակվող Վինիսիուս Ժունիորը եւ «Ռեալ Սոսյեդադ»-ի պաշտպան Ալվարո Օդրիոսոլան:
ԿԼՈՊԸ ԳՈՀ Է
Անգլիական «Լիվերպուլ»-ի գերմանացի գլխավոր մարզիչ Յուրգեն Կլոպը գոհ է ակումբի ամառային տրանսֆերային քաղաքականությունից: «Սա առաջին տարին է, որ մենք չենք վաճառում կարեւոր ֆուտբոլիստի: Մենք միշտ ունեցել ենք բազմաթիվ տրանսֆերային փոփոխություններ երկու ուղղություններով էլ: Այս անգամ կառուցում ենք թիմ` մնալով նույն կազմի հիմքի վրա: Կունենանք 25 խաղացող»,-ասել է Յուրգեն Կլոպը:
Այս ամռանը «Լիվերպուլ»-ը ձեռք է բերել կիսապաշտպաններ Ֆաբինյոյին, Նաբի Կեյտային եւ Ջերդան Շաքիրիին: Սպասվում է, որ առաջիկայում թիմը կհամալրի Բրազիլիայի հավաքականի դարպասապահ Ալիսոնը, որը կհեռանա իտալական «Ռոմա»-ից:
ԿՇԱՐՈՒՆԱԿԻ ՊՐԵՄԻԵՐ ԼԻԳԱՅՈՒՄ
Մյունխենի «Բավարիա»-ի հարձակվող Կինգսլի Կոմանը հնարավոր է` կարիերան շարունակի Անգլիայի Պրեմիեր լիգայում: 22-ամյա ֆուտբոլիստի տրանսֆերը գնելու մտադրություն ունի «Արսենալ»-ը: Կոմանին իր թիմում ցանկանում է տեսնել «զինագործների» գլխավոր մարզիչ Ունաի Էմերին: Տրանսֆերի համար «Արսենալ»-ը պատրաստ է «Բավարիա»-ին վճարել 44 միլիոն ֆունտսթերլինգ (49.6 միլիոն եվրո):
Հավելենք, որ ֆրանսիացի վինգերը «Բավարիա»-ի հետ մինչեւ 2023 թվականի ամառ գործող պայմանագիր ունի: Բունդեսլիգայի նախորդ խաղարկությունում Կոմանը մասնակցել է 21 հանդիպման, խփել է 3 գոլ եւ կատարել նույնքան գոլային փոխանցում:
.gif)
