ՀՀ քննչական կոմիտեի Շիրակի մարզային քննչական վարչությունում նախապատրաստվում են նյութեր Գյումրի քաղաքի 32-ամյա բնակչի մահվան հանգամանքները պարզելու ուղղությամբ:
Այս մասին հաղորդագրություն է տարածել ՀՀ քննչական կոմիտեն, որում ասված է.
«Վերջինիս մահվան վերաբերյալ ահազանգը ստացվել է 2021թ. նոյեմբերի 10-ին՝ ժամը 08:10-ին, «Գյումրու շտապբուժօգնության կայան» ՓԲ ընկերությունից և տեղեկացվել, որ «տրավմատիկ շոկ, պոլիտրավմա» ախտորոշումով «Գյումրի» բժշկական կենտրոն է տեղափոխվել նույն քաղաքի՝ 1989թ. ծնված բնակիչ, որը, գիտակցության չգալով, նշված բժշկական կենտրոնում մահացել է:
Ձեռնարկված անհետաձգելի միջոցառումների արդյունքում պարզվել է, որ 32-ամյա տղամարդը նշված մարմնական վնասվածքներն ստացել է իր բնակարանի ննջասենյակի պատուհանից վայր ընկնելու հետևանքով:
Կատարվել է դեպքի վայրի զննություն, նշանակվել է դատաբժշկական փորձաքննություն, հանձնարարություն է տրվել հետաքննության մարմնին՝ դեպքի հանգամանքները պարզելու վերաբերյալ»:
Հիշեցնենք, որ Գյումրու Մուշ-2 թաղամասի շենքերից մեկի 4-րդ հարկից քաղաքացին ընկել և «տրավմատիկ շոկ, պոլիտրավմա» ախտորոշմամբ տեղափոխվել էր Գյումրու բժշկական կենտրոն: Վերջինս, գիտակցության չգալով, մահացել էր:
.gif)
