ՀՅԴ «Նիլոլ Աղբալյան» ուսանողական միությունը և ՀՅԴ Հայաստանի Երիտասարդական միությունը հանդես են եկել հայտարարությամբ,ո րում մասնավորապես ասվում է. «Հունվարի 12ին Գյումրիում տեղի ունեցած անմարդկային ոճիրը և դրա նկատմամբ իրականացվող դատաիրավական գործընթացները համազգային մտահոգության տեղիք են տվել:
Դեպքերին հաջորդած քննչական գործողությունները, պաշտոնատար անձանց հայտարարությունների բովանդակությունները շարժեցին մեր ժողովրդի զայրույթը և համապատասխան կառույցների նկատմամբ անվստահության մթնոլորտի ստեղծման պատճառ դարձան հասարակության շրջանում՝ խոցելով մեր ազգային արժանապատվությունը: Խիստ մտահոգիչ է որոշ ռուս պաշտոնյաների կրավորական կացվածքը, հայկական կողմի՝ օրենքների և միջազգային պայմանագրերի կանխակալ մեկնաբանումը, բարձրաստիճան պաշտոնատար անձանց հայտարարությունների միջև հակասությունները:
Մինչդեռ միջազգային իրավունքը, ազգային օրենսդրությունը, հայ-ռուսական միջպետական պայմանագրերն ու համաձայնագրերը շատ հստակ սահմանում են նմանաբնույթ հարցերի լուծման ընթացակարգերը:
Ստեղծված իրավիճակի հրամայականն է, որ հասարակությունը և հատկապես երիտասարդությունը, անկախ քաղաքական հայացքներից ու գաղափարաբանական տարբերություններից, միահամուռ կերպով պահանջի հարցի այնպիսի լուծում, որը երբեք հարվածի տակ չի դնի մեր ազգային արժանապատվությունը, կընդգծի մեր պարտավորությունը անմեղ զոհերի հիշատակի ու նրանց հարազատների առջև՝ հասնելու գործի բազմակողմանի անաչառ քննության անցկացմանն ու ամբողջական բացահայտմանը:
Այդ քննությունը և դատավարությունը պետք է կատարվեն ՀՀ օրենսդրության շրջանակներում և Հայաստանի տարածքում:
.gif)
