Եղբայրը «պրիտենզիա» չուներ քրոջ մերկ նկարները սոցցանցում տեղադրողի նկատմամբ. ինչպես կինը պատժեց դավաճան ամուսնուն ու նրա սիրուհուն

Ամուսնու նախկին սիրուհու նկարները «odnoklassniki.ru» սոցիալական ցանցում տեղադրելու մեջ մեղադրվող Ռուզաննա Մնջոյանի վերաքննիչ բողոքը մերժվեց: Ինչպես հայտնի է՝ Ռուզաննան մեղավոր է ճանաչվել ՀՀ քրեական օրենսգրքի 144-րդ հոդվածով և դատապարտվել տուգանքի 250 000 ՀՀ դրամի չափով: Նշենք, որ մեղադրող դատախազը միջնորդել էր Ռուզաննային դատապարտել տուգանքի՝ 300 000 ՀՀ դրամի չափով:

Հիշեցնենք, որ 37-ամյա Ռուզաննան մեղադրվում է այն բանի համար, որ «odnoklassniki.ru» սոցիալական կայքում ստեղծել է ամուսնու նախկին սիրուհու` Գայանեի անվամբ էջ, որտեղ, առանց վերջինիս համաձայնության, տեղադրել է նրա մերկ լուսանկարը: Գայանեի վերաբերյալ անձնական գաղտնիք պարունակող տեղեկություն տարածելու համար Ռուզաննային մեղադրանք է առաջադրվել՝ ՀՀ քրեական օրենսգրքի 144-րդ հոդվածով:

Դատաքննության ընթացքում Ռուզաննայի անչափահաս որդին հայտարարել է, որ իրականում ինքն է լուսանկարը տեղադրել սոցիալական ցանցում` վրեժխնդրությունից դրդված, իսկ մայրն էլ, գործով ամբաստանյալ Ռ. Մնջոյանը հայտարարեց, որ ի սկզբանե չի ցանկացել, որպեսզի որդին ներքաշվի այս պատմության մեջ և նախաքննական մարմնին հայտնել է, որ ինքն է այդ լուսանկարները տեղադրել սոցիալական կայքում, սակայն իր 15-ամյա անչափահաս որդին պնդել է, որ պետք է դատարանում հայտնի այդ մասին: Տղան դատարանում հարցաքննվել է պաշտպանական կողմի միջնորդությամբ, որի ժամանակ հայտնել է, որ տանն ունեն մեկ համակարգիչ, որից օգտվում են բոլորը, սակայն մայրը չունի բավարար գիտելիքներ՝ համակարգչից օգտվելու համար. տղան մորը սովորեցրել է միայն, թե ինչպես նամակագրական կապ հաստատի և այդպես հաղորդակցվի ՌԴ-ում գտնվող ամուսնու և ընկերուհիների հետ

Անչափահաս տղան նաև նշել էր, որ տարիներ շարունակ իրենց տանը տեղի ունեցած վեճից հասկացել է, որ հայրը սիրուհի ունի, բացի այդ, տուժողն անընդմեջ զանգահարել է իրենց տուն, օրվա բոլոր ժամերին, անգամ հնչել են սպառնալիքներ տղայի հասցեին:

Տղան իր ցուցմունքում նշել էր նաև, որ «Odnoklassniki.ru» սոցիալական ցանցում այցելել է հոր անվամբ բացված էջը, որտեղ տեղադրված բազմաթիվ լուսանկարներում պատկերված են եղել հայրը, սիրուհին և 1 տարեկան երեխա, մի շարք նկարներում հայրն ու սիրուհին եղել են գրկախառնված: Հայրը տղային հավաստիացրել է, որ դա իր էջը չէ, իսկ վերջինս էլ խնդրել է, որպեսզի սիրուհին ջնջի այդ նկարները:

15-ամյա տղայի խոսքով՝չնայած իր խնդրանքներին՝ լուսանկարները սոցիալական ցանցից տուժողը չի հանել։ Ուստի՝ ինքն էլ որոշել է նոր էջ բացել տուժողի անվամբ և տեղադրել է հոր հիշողության կրիչի մեջ հայտնաբերած տուժողի մերկ լուսանկարները, որպեսզի, ինչպես անչափահաս վկան է ասել, «տեսնի ու ամաչի, ջնջի մյուս նկարները»:

Ի դեպ, դատաքննության ընթացքում վկայություն է տվել նաև տուժողի եղբայրը՝ Սիրեկան Խուդոյանը: Վերջինս հայտարարել է, որ ինքը կողմնակից է ավանդական հայկական ընտանիքներին և դեմ է եղել քրոջ ու նրա սիրեկանի արտաամուսնական հարաբերություններին, սակայն, ըստ նրա, փաստը մնում է փաստ, որ տղամարդը քրոջը խաբել է:

Ըստ վկայի՝ ամբաստանյալ Ռուզաննայի ամուսինը, ով եղել է նաև իր քրոջ «սիրեկանը», ասել է, թե նախկինում ամուսնացած է եղել իրենից 15 տարի մեծ եզդի մի կնոջ հետ և ներկայումս ամուսնալուծված է։ Վկայի խոսքով՝ «իր սրտով չի եղել, որ քույրը հանդիպում է ամուսնալուծված տղամարդու հետ», բայց քանի որ հասուն մարդիկ են եղել, թույլ է տվել, որ հանդիպեն: Իսկ հետագայում վկան տեղեկացել է, որ իրականում տղամարդն ունի կին և ընտանիք: Տուժողի եղբայրը հայտնել է նաև, որ սոցցանցում իր քրոջ մերկ լուսանկարով բացված էջով ինչ-որ մեկն այցելել է նույն սոցիալական ցանցի իր էջ և երբ տեսել է լուսանկարները, վկայի բնութագրմամբ, «գլխիս կրիշկեն թռավ»։

Ապա իմացել է, որ իր էջ է այցելել քրոջ սիրեկանի կինը, ով վկային ասել է, որ նրա քույրը քանդել է իր ընտանիքը, ուստիև՝ այդպես է արել։ Խուդոյանը դատարանում հայտարարել է, թե ինքը 15 րոպե ժամանակ է տվել՝ լուսանկարը սոցցանցից հանելու համար: Այնուհետև վկան զանգահարել է ամբաստանյալի ամուսնուն և ասել, որ անմիջապես գտնի, թե ով է տեղադրել այդ նկարները, «թե չէ վատ կլինի»: Վկայի այն հարցին էլ, թե որտեղից այդ լուսանկարը, ամբաստանյալը պատասխանել է, թե ամուսինը խմած-քնած է եղել, երբ ինքը նրա բջջայինից հանել է այդ լուսանկարներն ու տեղադրել սոցիալական ցանցում: Սակայն ամբաստանյալը հերքեց, որ ինքը նման բան է ասել վկային:

Ըստ վկայի՝ երբ քրոջ մերկ լուսանկարը տեղադրվել է սոցցանցում, ամբաստանյալն իրեն գրել է, որ այդ էջով նրա ընկերներին հյուր կգնա, որ խայտառակ կլինեն: Այդուհանդերձ, վկան հայտարարել է, որ ամբաստանյալի նկատմամբ «պրիտենզիա» չունի. ինքը խնդրել է քրոջ մերկ լուսանկարը հանել, նա էլ րոպեներ անց հանել է: Նշենք, որ միմյանց նկատմամբ անհարգալից վերաբերմունքի համար, դատարանը, մասնավորապես, պաշտպաններին դիտողություն արեց: