Շախմատը Հայաստանում միշտ էլ սիրված մարզաձեւ է եղել, բայց հատկապես վերջին տարիներին, երբ ՀՀԿ նախագահը դարձավ նաեւ Հայաստանի շախմատի ֆեդերացիայի նախագահ, այդ մարզաձեւի նկատմամբ ուշադրությունը, կարելի է ասել, բազմապատկվեց: Այսօր արդեն հանրակրթական դպրոցներում են շախմատ առարկան անցնում, ամենուր բացվում են շախմատի դպրոցներ, շախմատի ակադեմիայի մասնաճյուղեր…
Սակայն օրերս «Ժողովուրդ»-ն ահազանգ ստացավ, որ փակվել է հանրապետության շախմատային յուրահատուկ կենտրոն դարձած Ջերմուկի շախմատի դպրոցը։ Իհարկե, մեզ հետ զրույցում դպրոցի տնօրեն Երջանիկ Թադեւոսյանը հերքեց այդ լուրը, բայց նաեւ համոզվեցինք, որ, ինչպես ասում են, առանց կրակ ծուխ չի լինում։ «Մեզ մոտ նման բան չկա, ու մենք շաբաթը հինգ օր պարտադիր պարապում ենք։ Ունենք մոտ քառասուն սան, ովքեր հաճախել ու հաճախում են դպրոց»,-նշեց տնօրենը։ «Իսկ ձմռանը դասերը, պարապմունքները շարունակվելո՞ւ են, դպրոցը ջեռուցման հետ կապված եւ որեւէ այլ խնդիր չունի՞»,-հարցրինք տնօրենին։ «Ո՛չ, ո՛չ, որեւէ խնդիր չկա… Պարզապես ընդհանուր ջեռուցումն անջատել են, բայց այդ հարցը քաղաքապետի հետ մենք արդեն լուծել ենք, փչող էլեկտրական սարքերից ենք գնելու, որպեսզի դրանցով ջեռուցենք դպրոցը։ Գրոսմայստեր, շախմատի ֆեդերացիայի նախագահի առաջին տեղակալ, շախմատի ակադեմիայի տնօրեն Սմբատ Լպուտյանի հետ էլ ենք մի քանի օր առաջ այդ հարցի վերաբերյալ զրուցել մարզպետարանում, ամեն ինչ նորմալ է»,-պարզաբանեց շախմատի դպրոցի տնօրենը։
Զրույցի ընթացքում նաեւ տեղեկացանք, որ շախմատի ակադեմիայի Ջերմուկի մասնաճյուղն էլ է գործում նույն շենքում: Շախմատի դպրոցում պարապում են 4-14 տարեկան երեխաներ, քանի որ մեծերը լքել են դպրոցը բարձրագույն ուսումնական հաստատություններ ընդունվելու պատճառով։ Իսկ ընդհանրապես դպրոցի լավագույն սաները տեղափոխվում են ակադեմիայի մասնաճյուղ, որտեղ ուսուցումն իրականացվում է ուրիշ, ավելի բարդ ծրագրով։ Ընդ որում, թե՛ դպրոցի, թե՛ ակադեմիայի մասնաճյուղի մասնագետները, մանկավարժները տեղաբնակներ են։
Հիշեցնենք, որ Ջերմուկում անցկացվում է վաղամեռիկ երիտասարդ գրոսմայստեր Կարեն Ասրյանի անվան միջազգային հուշամրցաշարը, այլ միջազգային եւ հանրապետական մրցաշարեր, դպրոցական օլիմպիադաներ։
.gif)
