Երեւանի քաղաքապետ Հայկ Մարությանը հյուրընկալել է «Էրեբունի-Երեւան 2800» տոնական միջոցառումներին մասնակցելու նպատակով Երեւան ժամանած Սանկտ Պետերբուրգի փոխնահանգապետ Աննա Միտյանինային: Շնորհակալություն հայտնելով հրավերն ընդունելու եւ Երեւանի օրվան նվիրված միջոցառումներին մասնակցելու համար՝ քաղաքապետ Հայկ Մարությանը նկատել է, որ սա լավ առիթ է՝ քննարկելու երկու քաղաքների միջեւ հաստատված ծրագրերի ընթացքն ու նախանշելու առաջիկա անելիքները:
«Ես տեղյակ եմ, որ Երեւանի եւ Սանկտ Պետերբուրգի միջեւ հաստատված համագործակցության շրջանակում այս տարիների ընթացքում իրականացվել են բազում ծրագրեր քաղաքային տնտեսության տարբեր ուղղություններով: Առանձնակի կարեւորում եմ նաեւ առողջապահական ոլորտում առարկայական համագործակցությունը՝ մասնավորապես պոլիկլինիկաների արդիականացման ուղղությամբ փորձի փոխանակման ծրագրերի իրականացման: Համոզված եղեք, որ ես եւս պատրաստ եմ իմ ներդրումն ունենալ բարեկամական ու գործնական այդ կապերի առավել ամրապնդման ու զարգացման գործում»,- նշել է Հայկ Մարությանն ու փոխնահանգապետին խնդրել իր շնորհակալությունը փոխանցել Սանկտ Պետերբուրգի նահանգապետի ժամանակավոր պաշտոնակատար Ալեքսանդր Բեգլովին՝ քաղաքապետի պաշտոնում ընտրվելու առթիվ իրեն հղած շնորհավորանքի ու բարեմաղթանքների համար:
Շնորհակալություն հայտնելով հրավերի եւ ջերմ ընդունելության համար՝ Սանկտ Պետերբուրգի փոխնահանգապետ Աննա Միտյանինան նախ շնորհավորել է Հայկ Մարությանին Երեւանի քաղաքապետի պաշտոնում ընտրվելու առթիվ եւ մաղթել նրան գործնական հաջողություններ՝ ստանձնած կարեւոր առաքելության մեջ: Սանկտ Պետերբուրգի փոխնահանգապետն ընդգծել է, որ երկու կողմերի հարաբերությունների ներուժն ակնհայտորեն զարգացման եւ ընդլայնման լայն հնարավորություններ ունի:
«Պարոն քաղաքապետ, Սանկտ Պետերբուրգի պատվիրակությունը միշտ մեծ սիրով է մասնակցում Երեւանի օրվան նվիրված տոնական միջոցառումներին: Համոզված եմ, որ այս տարի եւս Սանկտ Պետերբուրգ կվերադառնանք մեզ հետ տանելով 2800-ամյա Երեւանի ջերմությունը: Երեւանն իսկապես վստահելի գործընկեր է ՌԴ հյուսիսային մայրաքաղաքի համար, եւ ես վստահ եմ, որ Երեւանի եւ Սանկտ Պետերբուրգի միջեւ առկա հարաբերությունների առավել սերտացման ու գործնական ծրագրերի կյանքի կոչման ուղղությամբ առաջիկա տարիներին եւս հետեւողական քայլեր կձեռնարկվեն», – նշել է Աննա Միտյանինան:
Հանդիպման ընթացքում կողմերը քննարկել են նաեւ առեւտրատնտեսական, ներդրումային բնագավառներում համագործակցության հնարավոր հեռանկարները:
.gif)
