«Վեոլիա Ջուր»-ը շնորհակալություն է հայտնում առաջնագծում աշխատող իր թիմի անդամներին  

«Վեոլիա Ջուր» ընկերությունը շնորհավորում է իր թիմի անդամներին Աշխատանքի օրվա կապակցությամբ և շնորհակալություն հայտնում նրանց նվիրվածության ու պատասխանատու աշխատանքի համար։

 Պաշտոնական ուղերձում ընկերությունը շնորհակալություն է հայտնում Վեոլիա թիմի անդամներին, ովքեր Covid-19–ի օրերին, վտանգելով իրենց առողջությունը, շարունակում են աշխատել առաջնագծում՝ հանուն մեր քաղաքացիների առողջության կարևորագույն գրավականի՝ կայուն ջրամատակարարման։

 Գնահատելով թիմի անդամների նվիրվածությունն ու բարեխիղճ աշխատանքը՝ «Վեոլիա Ջուր»-ը առաջնագծում աշխատող թիմակիցներին տրամադրում է պարգևավճարներ։

Ընկերությունը նշում է, որ ամբողջությամբ գիտակցում է այն մեծ պատասխանատվությունը, որ այժմ կրում է և հավաստիացնում, որ արվում է հնարավորը՝ համակարգի շարունակական աշխատանքն ապահովելու և առաջացած խնդիրներն ամենասեղմ ժամկետում լուծելու համար։

«Վեոլիա Ջուր» ընկերության գլխավոր տնօրեն Մարիաննա Շահինյանի ամբողջական ուղերձն իր աշխատակիցներին կարող եք գտնել այստեղ։

Սիրելի Վեոլիա թիմ,

Ուզում եմ շնորհակալություն հայտնել ձեզ COVID-19-ի ընթացքում կատարվող ձեր ամենօրյա ու ինձ համար հերոսական աշխատանքի համար։ Այս օրերին ջրամատակարարման համակարգի անխափան ընթացքն ապահովելու համար մասնագիտական փորձառության և հմտությունների կողքին անչափ գնահատելի են ձեր նվիրվածությունն ու անձնական ներդրումը։

Ես՝ որպես «Վեոլիա Ջուր» ընկերության գլխավոր տնօրեն ու նաև որպես Հայաստանի քաղաքացի, անչափ հպարտ եմ, որ մեր թիմակիցները, հաճախ վտանգելով անգամ իրենց առողջությունը, այս պահին էլ շարունակում են աշխատել առաջնագծում՝ հանուն մեր համերկրացիների առողջության կարևորագույն գրավականի՝ անխափան ջրամատակարարման։

Մեր աշխատանքն այսօր կարևոր է առավել, քան երբևէ։ Ես հպարտ եմ, որ ձեզանից յուրաքանչյուրի ներդրման շնորհիվ այսօր «Վեոլիա»–ն պատվով է կատարում ազգային անվտանգության նշանակություն ստացած իր ծառայությունը՝ պատրաստ կանգնած է առողջապահության համակարգի և բնակիչների կողքին։ Համոզված եմ, որ հենց համախմբված և միահամուռ ուժերով կարող ենք հաղթահարել այս նոր մարտահրավերը ու դուրս գալ հաղթանակած։

Սիրելի թիմ, «Վեոլիա» ընկերությունը գնահատում է ձեր նվիրվածությունն ու բարեխիղճ աշխատանքը և որպես փոքրիկ երախտիք առաջնագծում աշխատող մեր թիմակիցների համար սահմանել ենք նաև պարգևավճարներ։ Համոզված եմ ձեզ նման աշխատակիցների հետ, ձեր շնորհիվ մենք կարող ենք գրավել ցանկացած բարձունք։

Անչափ շնորհակալ եմ։ Եղեք առողջ. մի մոռացեք, որ ձեր առողջությունն այսօր արդեն ոչ միայն ձեր հարազատների, այլև հազարավոր այլ մարդկանց անվտանգության երաշխիքներից է։

Միշտ Ձեր կողքին՝

Մարիաննա Շահինյան՝

«Վեոլիա Ջուր» ՓԲԸ-ի գլխավոր տնօրեն