Կոնգոյի պետական դատախազը մահապատիժ է պահանջել երկրի նախկին նախագահի համար

Կոնգոյի պետական դատախազը ուրբաթ օրը մահապատիժ է պահանջել նախկին նախագահ Ջոզեֆ Կաբիլայի համար, որին հեռակա կարգով դատում են պետական դավաճանության գործով, որը ներառում է M23 ապստամբ խմբավորման հետ նրա կապերի հետ կապված ռազմական հանցագործությունների մեղադրանքներ, հայտնում է Associated Press-ը։

Կաբիլան, որը Կոնգոն ղեկավարել է 2001-2019 թվականներին, հուլիսից հետաքննության տակ է ռազմական հանցագործությունների, սպանությունների և բռնաբարությունների մեղադրանքով։ Նա պաշտոնը ստանձնել է 29 տարեկանում՝ այն բանից հետո, երբ սպանվել է նրա հայրը՝ նախկին նախագահ Լորան Կաբիլան, և երկարացրել է իր լիազորությունները՝ երկու տարով հետաձգելով ընտրությունները 2017 թվականին իր լիազորությունների ժամկետի ավարտից հետո։

Կոնգոյի կառավարությունը նրան մեղադրում է Ռուանդայի կողմից աջակցվող M23 ապստամբներին սատարելու մեջ, որոնք վերջին ամիսներին գրավել են երկրի արևելքում գտնվող խոշոր քաղաքներ։ Կաբիլան 2023 թվականից մինչև ապրիլ կամավոր աքսորի մեջ է եղել, իսկ ապստամբների սրընթաց հարձակման արդյունքում քաղաքը գրավելուց հետո ժամանել է ապստամբների կողմից վերահսկվող Գոմա քաղաք։

Նրա կողմնակիցները հայտարարում են, որ դատավարությունը քաղաքական դրդապատճառներ ունի։ Կաբիլայի նախագահական անձեռնմխելիությունը վերացվել է մայիսին։ Նրա ներկայիս գտնվելու վայրն անհայտ է։ Ուրբաթ օրը դատարանում մեղադրող կողմը ներկայացնող գեներալ Լյուսյեն Ռենե Լիկուլիան, ի լրումն մահապատժի, խնդրել է նաև Կաբիլային դատապարտել 20 տարվա ազատազրկման՝ ռազմական հանցագործություններին ենթադրյալ թողտվություն տալու և 15 տարվա ազատազրկման՝ դավադրությանը մասնակցելու համար։ Գեներալը չի մանրամասնել այս մեղադրանքները և չի ասել, թե ինչին են դրանք վերաբերում։ Դատավճռի հրապարակման ամսաթիվը դեռ նշանակված չէ։

Կոնգոյի նախագահ Ֆելիքս Չիսեկեդին անցյալ տարի Կաբիլային մեղադրել է ապստամբներին աջակցելու և նրանց հետ ապստամբություն նախապատրաստելու մեջ, ինչը Կաբիլան հերքում է։