Մեդիամաքս մեդիա ընկերությունը եւ ՎիվաՍել-ՄՏՍ-ն այսօր Երեւանում ներկայացրել են «100 վայրկյան» նախագիծը:
«100 վայրկյան» նախագիծը հիմնված է Ցեղասպանության ականատեսների վկայությունների վրա, որոնք հրապարակվել են Հայաստանի Ազգային արխիվի կողմից: Աշխարհում կամ իրենց երկրներում հայտնի մարդկանց՝ գրողներին, երաժիշտներին, դերասաններին, լրագրողներին, առաջարկվել էր կարդալ 100 վայրկյան տեւողությամբ հատվածներ այդ վկայություններից:
Նախագծի շրջանակներում պատրաստվել է 24 տեսահոլովակ, որոնք մարտի 23-ից սկսված ամեն օր տեղադրվելու են www.Mediamax.am/100 seconds կայքում:
Կոմիտասի թանգարան-ինստիտուտում կայացած շնորհանդեսից առաջ համատեղ մամուլի ասուլիսով հանդես եկան Հայոց ցեղասպանության 100-րդ տարելիցի միջոցառումները համակարգող պետական հանձնաժողովի քարտուղար, ՀՀ նախագահի աշխատակազմի ղեկավար Վիգեն Սարգսյանը, ՎիվաՍել-ՄՏՍ-ի գլխավոր տնօրեն Ռալֆ Յիրիկյանը և Մեդիամաքսի տնօրեն Արա Թադեւոսյանը:
«100 վայրկյան» նախագծի գլխավոր նպատակը մարդկության ուշադրությունը գրավելն է այն սոսկալի տառապանքների վրա, որոնք 100 տարի առաջ կրել են հայերը: Այդ վկայությունները հեշտ չէ կարդալ եւ լսել, սակայն որքան շատ մարդ ցնցվի լսածից, այդքան մեծ կլինի հավանականությունը, որ նրանք կանեն հնարավոր ամեն ինչ՝ նոր ցեղասպանություններ թույլ չտալու համար: Մեր նախագիծը կոչված է հերքելու Ադոլֆ Հիտլերի այն խոսքերը, որոնք նա ասել էր 1939 թ-ին՝ Լեհաստան ներխուժելուց մեկ շաբաթ առաջ. «Եվ ո՞վ է այսօր հիշում հայերի վերացման մասին», – ասել է Արա Թադեւոսյանը:
«Ուզում եմ հատուկ շնորհակալություն հայտնել ՎիվաՍել-ՄՏՍ ընկերությանը, որը պարբերաբար կանգնում է նման կարևորագույն նշանակություն ունեցող սոցիալական նախաձեռնությունների կողքին: Տվյալ դեպքում ունենք արդյունք, որը նաև կարևոր է նրանով, որ նախագծի մասնակիցները առանց որևէ վճարի՝ օգտագործելով իրենց բարի համբավն ու ճանաչելիությունը, նպաստել են մեր պատմությունը ավելի լսելի դարձնելու գործին: Որպես պետական հանձնաժողովի համակարգող ողջունում եմ նախագիծն ու բոլորին խնդրում եմ աջակցել այդ նյութերի տարածմանը», – ասել է Վիգեն Սարգսյանը:
«Մեր ընկերությունը կարևորում է «100 վայրկյան» նախագծի իրականացումը: Վերջին 10 տարիների ընթացքում մենք Մեդիամաքսի հետ համատեղ շատ նշանակալի նախագծեր ենք իրականացրել, սակայն այս մեկը առանձնահատուկ է, քանի որ պետք է աշխարհին հիշեցնի հայոց պատմության սարսափելի էջի մասին: Մենք շնորհակալ ենք տարբեր ազգություններ ներկայացնող մարդկանց, ովքեր մասնակցել են այս նախագծին եւ դրանով ապացուցել, որ Ցեղասպանության խնդիրը միայն հայերին չէ վերաբերում», – ասել է Ռալֆ Յիրիկյանը:
ՎիվաՍել-ՄՏՍ-ը նախաձեռնության գլխավոր հովանավորն է, իսկ post-production աշխատանքները կատարել է «Թումո Դիզայն» ընկերությունը:
.gif)
