«Ժողովուրդ» օրաթերթի զրուցակիցը «Խաղ իմ կանոններով», «Իմ փոքրիկ փեսացուն» ֆիլմերից, «Կյանքից առավել», «Եռաչափ սեր» հեռուստասերիալներից, «Outdance» պարային սիթքոմից հայտնի դերասանուհի Լիա Զախարյանն է: Նա անդրադարձել է ապագայի իր պլաններին, նշել, որ ցանկանում է բացահայտել տարբեր երկրներ՝ իրենց մշակույթով եւ բնությամբ: Դերասանուհին պատմել է, թե ինչպիսին է պատկերացնում իր երազանքների աշխարհը: Նա խոսել է մարդկային այն տեսակի մասին, որին մոտ չի թողնում իրեն, խոստովանել, որ չի համակերպվում այն մտքի հետ, որ մարդիկ կարող են երբեւէ հանձնվել:Լիան խոսել է նաեւ իր այն շնորհից, որի մասին քչերը գիտեն:
-Լիա՛, կյանքից թանկ բան կա՞:
-Կարծում եմ՝ ոչ:
-Ժամանակը պետք է ծախսել այն մարդկանց վրա, որոնք…
-Ապրում են քո ներկայում: Պետք չէ ապրել ո՛չ անցյալով, ո՛չ ապագայով:
-Ավելի հետաքրքիր է շփվել տարիքով փոքրերի՞, թե՞ մեծերի հետ:
-Երկուսի հետ էլ հետաքրքիր է, երկուսից էլ սովորելու շատ բան կա:
-Երբեք չէիք պատկերացնի, որ մի օր…
-Ես ամեն ինչն էլ պատկերացրել եմ, օրինակ՝ հայտնի դառնալս: Նույնկերպ պատկերացումներ ունեմ նաեւ ապագայի վերաբերյալ:
-Ձեզ միշտ դուր են եկել այն տղաները, որոնք…
-Որոնք դուր են եկել (ծիծաղում է):
-Ծաղիկները ավելի գեղեցիկ են պարտեզո՞ւմ, թե՞ տնային պայմաններում:
-Բոլոր դեպքերում նախընտրում եմ ծաղիկները հողի մեջ տեսնել:
-Աստվածաշնչում կա՞ պատվիրան, խոսք, որը Ձեզ համար վիճարկելի է:
-Ոչ, պատվիրանները միշտ, կրկնում եմ, ինձ համար վիճարկելի բան չկա:
-Ձեզ համար մեծ հաջողություն կլիներ, եթե…
-Մեր երկրում բոլոր ոլորտներում ակտիվ մրցակցություն լիներ:
-Ազգային որակ, բնավորություն, որ կցանկանայիք փոխել:
-Շատ կան…Կցանկանայի մարդիկ ավելի գնահատող եւ շնորհակալ լինեին:
-Ձայն, որ միանգամից կճանաչեք բոլոր պայմաններում:
-Առհասարակ, ես բոլորի ձայներն էլ լավ ճանաչում եմ: Նույնիսկ երբ զանգահարում են ինձ եւ, ձայնները փոխած, խոսում են, ես անմիջապես գլխի եմ ընկնում, թե ով է կատակ անողը:
-Ունե՞ք մի շնորհ, որ չեք օգտագործում:
-Այո, գրելու ձիրք ունեմ, դեռ դպրոցական տարիներից գրում էի ե՛ւ չափածո, ե՛ւ արձակ գործեր: Փոքր ժամանակ դրանք ցույց էի տալիս շրջապատիս մարդկանց: Հիմա էլ ստեղծագործում եմ, բայց չեմ հրապարակում: Գրում եմ ու փակում դարակիս մեջ:
-Ավելի լավ է լինել խաղաղ եւ մենա՞կ, թե՞ ապրել դժվարին, խոչընդոտներով լի կյանքով ինչ-որ մեկի հետ:
-Իհարկե, դժվարին կյանք ինչ-որ մեկի հետ: Բոլոր կարգի հարաբերություններում բարդություններն անխուսափելի են:
-Եթե ստեղծեիք Ձեր աշխարհը, ինչպիսի՞ն կլիներ այն:
-Շատ ջուր կլիներ այնտեղ, կլինեին հսկա ծառատեսակներ, շատ կանաչ, ծաղիկներ, համեղ մրգեր, բանջարեղեններ, սիրուն նավեր, լիքը վազվզող, պարող, ժպտացող մարդիկ:
-Դժվարությամբ եք համակերպվում այն մտքի հետ, որ…
-Մարդիկ որեւէ հարցում հանձնվում են:
-Ո՞վ էր Ձեր սիրելի ուսուցիչը:
-Հայոց լեզվիս ուսուցչուհին՝ Սոնա Հարությունյանը: Երբ նա խոսում էր, ես լսում էի: Այսինքն՝ դասարանը կառավարելու ունակություն ուներ, կոկիկ էր, ճաշակով, շատ լավ մասնագետ էր, որի շնորհիվ հայոց լեզվի ունակություններս զարգացրել եմ, հետաքրքրվել եմ մեր լեզվով:
-Մարդկային ո՞ր տեսակին մոտ չեք թողնում:
-Քծնող եւ շահամոլ:
-Սիրո մեջ ինչպիսի՞ն եք:
-Հանդուրժող, ներողամիտ, փոխզիջող:
-Կինը գեղեցիկ է, երբ…
-Կանացի է:
-Սիրելի կոմպոզիտորը:
-Մանսուրյան:
-Մի բան, որ ապագայում անպայման պետք է անեք:
-Մտադիր եմ շրջել տարբեր երկրներում, ճանաչել տարբեր մշակույթներ, ծանոթանալ տեղանքներին, չեմ ուզում սահմանափակվել Հայաստանով:
Աննա Բաբաջանյան
.gif)
