Այս պահին Հրայր Թովմասյանն իր բնակարանում է, սակայն քննչական գործողությունը չի սկսվել, քանի որ վերջինիս ու պաշտպան Միհրան Պողոսյանին թույլ չեն տալիս ամբողջական ծավալով ծանոթանալ խուզարկության մասին դատարանի որոշմանը: Այս մասին լրագրողներին հայտնեց ՍԴ նախագահի պաշտպաններից Ամրամ Մակինյանը:
«Մենք թե՛ գրավոր, թե՛ բանավոր միջնորդել ենք քննիչին հնարավորություն տալ ծանոթանալ որոշմանը, հնարավորություն տալ պատճեն ստանալ: Մենք իրավունք ունենք բողոքարկելու դատարանի որոշումը, սակայն ինչպես կարող ենք դա անել, եթե դրա պատճենը չունենք: 4-5 թերթ փաստաթուղթը հիշողությա՞մբ ենք բողոքարկելու: Սա ի՞նչ պրակտիկա է»:
Մակինյանը նշեց, որ ինքը ծանոթացել է որոշմանը, սակայն Պողոսյանին ու Թովմասյանին թույլ չեն տալիս ծանոթանալ, քննիչն ընթերցում է ու ասում՝ ծանոթացեք. «Մեզ հնարավորություն չի տրվում պատճեն ստանալ, ինչի իրավունքն ունենք»:
Մակինյանի խոսքերով, հերթական անգամ խախտվում են Հրայր Թովմասյանի իրավունքները. «Հիմա էլ բնակարանի անձեռնմխելիության իրավունքն է խախտվում, ինչը քրեական հետապնդման ուղղված գործողություններից մեկն է»:
Հիշեցնենք, որ ՍԴ նախագահ Հրայր Թովմասյանին մեղադրանք է առաջադրվել 2019 թվականի դեկտեմբերի 27-ին՝ ՀՀ քրեական օրենսգրքի 308-րդ հոդվածի 2-րդ մասի հատկանիշներով՝ պաշտոնեական լիազորությունները չարաշահելու համար։
.gif)
