ՏԵՍԱՆՅՈՒԹ․ Ժամկետային զինծառայողներին հարկադրել են քվեարկել պատգամավորի թեկնածուի օգտին. ՊՆ հրամանատարը դատվեց. որոշում

2018 թվականի խորհրդարանական ընտրություններում զորամասի մի խումբ ժամկետային զինծառայողների հարկադրել էին քվեարկել ԱԺ պատգամավորության թեկնածու Արայիկ Աղաբաբյանի օգտին եւ այդ արարքի համար դատարնում է հայտնվել հրամանատարը։

Մասնավորապես, ArmLur.am-ին հայտնի դարձավ, որ Նորայր Խաչատրյանին մեղադրանք է առաջադրվել, որ նա, լինելով ՀՀ ՊՆ N զորամասի 3-րդ ուսումնական գումարտակի հրամանատարը, 2018թ. դեկտեմբերի 9-ին նշանակված ՀՀ ազգային ժողովի արտահերթ ընտրություններիօրը, օգտագործելով ծառայողական կախվածությունը, հարկադրել է նույն զորամասի մի խումբ ժամկետային զինծառայողների քվեարկել պատգամավորության թեկնածու Արայիկ Աղաբաբյանի օգտին:
Այս արարքի համար Նորայր Խաչատրյանին մեղադրանք է առաջադրվել ՀՀ քրեական օրենսգրքի 154.2-ի 3-րդ մասով (կաշառք ստացող անձն ազատվում է քրեական պատասխանատվությունից, եթե այդ անձը մինչեւ իրավապահ մարմիններին կատարված հանցանքի մասին հայտնի դառնալը, բայց ոչուշ, քան եռօրյա ժամկետում, կաշառք ստանալու մասին կամավոր հայտնել է իրավապահ մարմիններին եւ աջակցել հանցագործությունը բացահայտելուն):
Նորայր Խաչատրյանի նկատմամբ խափանման միջոց է ընտրվել ստորագրությունը` երկրից չհեռանալու մասին, իսկ, ահա, նրա գործը քննվելու է Արմավիրի մարզի ընդհանուր իրավասության դատարանում, իսկ գործը նախագահելու է դատավոր Արմեն Հովհաննիսյանը:

Եվ ահա 4 տարի անց դատարանը կայացրեց որոշում ամբաստանյալ Նորայր Խաչատրյանին մեղավոր ճանաչել 2003 թվականի ապրիլի 18-ին ընդունված ՀՀ քրեական օրենսգրքի 154.2-րդ հոդվածի 3-րդ մասով (համապատասխանում է 2021 թվականի մայիսի 05-ին ընդունված ՀՀ քրեական օրենսգրքի 210-րդ հոդվածի 3-րդ մասի 2-րդ կետին) նախատեսված հանցավոր արարքի կատարման մեջ և նրա նկատմամբ նշանակել ազատազրկման ձևով պատիժ՝ 3 (երեք) տարի ժամկետով։

2003 թվականի ապրիլի 18-ին ընդունված ՀՀ քրեական օրենսգրքի 70-րդ հոդվածի կիրառմամբ՝ ամբաստանյալ Նորայր Ռաֆիկի Խաչատրյանի նկատմամբ ազատազրկման ձևով նշանակված պատիժը պայմանականորեն չկիրառել՝ սահմանելով փորձաշրջան՝ 4 տարի ժամկետով:

Քնար Մանուկյան