Կառավարությունն իր այսօրվա՝ մարտի 6-ի նիստում Շիրակի մարզի Աշոցք համայնքի Բավրա բնակավայրի 2-րդ փողոցի N 6 հասցեի հողամասի նկատմամբ հանրության գերակա շահ ճանաչելու մասին որոշում կայացրեց:
Հիմնավորման մեջ նշվում է, որ Բավրայում նախատեսվում է կառուցել դպրոցի նոր շենք, որի համար էլ անհրաժեշտություն է առաջացել հիշյալ հողամասի նկատմամբ ճանաչել հանրային գերակա շահ:
Կառուցումն իրականացվելու է հասարակական նշանակության կառուցապատման համար նախատեսված՝ սեփականության իրավունքով ֆիզիկական անձանց պատկանող 3 հողամասերի տարածքում: Այդ 3 հողամասերից 2-ի սեփականատերերը ցանկանում են իրենց պատկանող հողամասերը նվիրաբերել Հայաստանի Հանրապետությանը:
Իսկ հողամասերից 3-րդի նկատմամբ (մակերեսը՝ 3850 քմ, սեփականատեր՝ Շուշանիկ Փայլակի Իվանյան), առկա է 504 665 ՀՀ դրամի պահանջի չափով Հարկադիր կատարման ծառայության կողմից կիրառված արգելանք, ուստի անհրաժեշտություն է առաջացել նշված հողամասի նկատմամբ կիրառել հանրության գերակա շահ ճանաչելու մասին կարգավորումները:
.gif)
