Թրամփը պահանջում է Իրանի միջուկային ծրագրի լիակատար դադարեցում

ԱՄՆ նախագահ Դոնալդ Թրամփը, G7 գագաթնաժողովը վաղաժամ լքելուց հետո, հայտարարել է, որ Իրանի հետ պարզապես զինադադար չի փնտրում, այլ պահանջում է, որ Թեհրանը ամբողջովին հրաժարվի իր միջուկային ծրագրից ։

«Իրանը շատ մոտ է միջուկային զենք ունենալուն», – նշել է Թրամփը Air Force One ինքնաթիռում լրագրողների հետ զրույցի ընթացքում։

Նախագահը հերքել է Ֆրանսիայի նախագահ Էմանուել Մակրոնի պնդումները, թե ինքը վերադառնում է Վաշինգտոն զինադադարի շուրջ աշխատելու համար։ «Սա շատ ավելի մեծ հարց է և երկար ժամանակ կպահանջվի այն լուծելու համար», – ընդգծել է նա։

Թրամփը նաև զգուշացրել է, որ Իրանը չպետք է սպառնա ամերիկյան զինծառայողներին։ «Մենք շատ կոշտ կպատասխանենք, եթե նրանք որևէ բան անեն մեր մարդկանց հետ», – ասել է նախագահը։

Թրամփը հրաժարվել է մեկնաբանել՝ արդյոք Միացյալ Նահանգները կմիանա Իրանի միջուկային օբյեկտների ոչնչացման ծրագրին, սակայն հույս է հայտնել, որ դրանք «կոչնչացվեն շատ ավելի վաղ»։