ՆՈՐ ՓԱՍՏԱԹՂԹԵՐ ՍՏՈՐԱԳՐՎԵՑԻՆ

Իրանի նախագահ Մասուդ Փեզեշքիանի՝ Հայաստան կատարած պաշտոնական այցի շրջանակում Հայաստանի եւ Իրանի միջեւ ստորագրվեցին մի շարք փաստաթղթեր։

Հայաստանի վարչապետ Նիկոլ Փաշինյանը եւ Իրանի նախագահ Մասուդ Փեզեշքիանը ստորագրեցին համատեղ հայտարարություն։

Հայաստանի եւ Իրանի ԱԳ նախարարությունների միջեւ ստորագրվեց 2025-2027 թվականների քաղաքական խորհրդակցությունների մասին հուշագիր։ Հայկական կողմից փաստաթուղթը ստորագրեց Հայաստանի ԱԳ նախարար Արարատ Միրզոյանը, իրանական կողմից՝ Իրանի ԱԳ նախարար Աբաս Արաղչին։

Հայաստանի էկոնոմիկայի նախարարության եւ Իրանի ստանդարտների ազգային կազմակերպության միջեւ ստորագրվեց ստանդարտացման, հավատարմագրման, համապատասխանության գնահատման, չափագիտության եւ տեխնիկական կանոնակարգման ոլորտներում համագործակցության մասին փոխըմբռնման հուշագիր։ Հայկական կողմից փաստաթուղթը ստորագրեց ՀՀ էկոնոմիկայի նախարար Գեւորգ Պապոյանը, իրանական կողմից՝ Իրանի նախագահի տեղակալ Սեյեդ Համիդ Փուրմոհամադին։

Հայաստանի էկոնոմիկայի նախարարության եւ Իրանի մշակութային ժառանգության, զբոսաշրջության եւ ձեռարվեստի նախարարության միջեւ զբոսաշրջության ոլորտում համագործակցության մասին հուշագիր ստորագրվեց։ Հայկական կողմից ստորագրեց ՀՀ էկոնոմիկայի նախարար Գեւորգ Պապոյանը, իրանական կողմից՝ ԻԻՀ մշակութային ժառանգության, զբոսաշրջության եւ ձեռարվեստի նախագահ Սալեյ Ամիդին։

ՀՀ կրթության, գիտության, մշակույթի եւ սպորտի նախարարության ու Իրանի կոոպերացիայի, աշխատանքի եւ սոցիալական բարեկեցության նախարարության միջեւ ստորագրվեց մասնագիտական կրթության եւ ուսուցման ոլորտում 2025-2029 թվականների համագործակցության մասին փոխըմբռնման հուշագիր։ Հայկական կողմից փաստաթուղթը ստորագրել է ՀՀ ԿԳՄՍ նախարար Ժաննա Անդրեասյանը, իրանական կողմից՝ ԻԻՀ հանքարդյունաբերության նախարար Սեյեդ Մոհհամադ Աթաբաքը։

Հայաստանի քաղաքաշինության կոմիտեի եւ Իրանի ճանապարհների եւ քաղաքաշինության նախարարության միջեւ ստորագրվեց փոխըմբռնման հուշագիր քաղաքաշինության եւ շինարարության ոլորտներում համագործակցության մասին։ Հայկական կողմից փաստաթուղթը ստորագրել է ՀՀ քաղաքաշինության կոմիտեի նախագահ Եղիազար Վարդանյանը, իրանական կողմից՝ Իրանի ճանապարհների եւ քաղաքաշինության նախարար Ֆարզանե Սադեւը։

Հայաստանի առողջապահության նախարարության դեղերի եւ բժշկական տեխնոլոգիաների փորձագիտական կենտրոնի եւ Իրանի առողջապահության եւ բժշկական կրթության նախարարության սննդի եւ դեղերի կառավարման վարչության միջեւ ստորագրվեց փոխըմբռնման հուշագիր բժշկական արտադրանքի կարգավորման բնագավառում համագործակցության մասին։ Հայկական կողմից փաստաթուղթը ստորագրեց ՀՀ առողջապահության նախարարի տեղակալ Արմեն Գասպարյանը, իրանական կողմից՝ ՀՀ-ում Իրանի դեսպան Մեհդի Սոբհանին։

Հայաստանի ազգային արխիվի եւ Իրանի ազգային գրադարանի եւ արխիվի միջեւ ստորագրվեց փոխըմբռնման հուշագիր։ Հայկական կողմից ստորագրեց Հայաստանի ազգային արխիվի տնօրեն Արթուր Ստեփանյանը, իրանական կողմից՝ Իրանի մշակույթի եւ իսլամական առաջնորդության նախարարի տեղակալ Ռայեդ Ֆարիդզադեն։

Հայաստանի ազգային գրադարանի եւ Իրանի ազգային գրադարանի եւ արխիվի միջեւ ստորագրվեց փոխըմբռնման հուշագիր։ Հայկական կողմից ստորագրեց Իրանում Հայաստանի դեսպան Գրիգոր Հակոբյանը, իրանական կողմից՝ Իրանի մշակութային ժառանգության, զբոսաշրջության եւ ձեռարվեստի նախարարության միջազգային հարաբերությունների եւ հանրային դիվանագիտության կենտրոնի ղեկավար Մոջաթոլլահ Այուբին։

Հայաստանի պատմության թանգարանի եւ Իրանի ազգային թանգարանի միջեւ ստորագրվեց փոխըմբռնման հուշագիր։ Հայկական կողմից ստորագրեց Հայաստանի պատմության թանգարանի տնօրեն Դավիթ Պողոսյանը, իրանական կողմից՝  Իրանի մշակութային ժառանգության, զբոսաշրջության եւ ձեռնարվեստի նախարարության միջազգային հարաբերությունների եւ հանրային դիվանագիտության կենտրոնի ղեկավար Մոջաթոլլահ Այուբին։

Հայաստանի կրթության, գիտության, մշակույթի եւ սպորտի նախարարության Հայաստանի կինոյի հիմնադրամի եւ Իրանի մշակույթի եւ իսլամական առաջնորդության նախարարության կինոյի հարցերի կազմակերպման միջեւ ստորագրվեց կինոփոխանակումների եւ համագործակցության վերաբերյալ փոխըմբռնման հուշագիր։ Հայկական կողմից ստորագրեց Հայաստանի կինոյի հիմնադրամի տնօրեն Դավիթ Բանուչյանը, իրանական կողմից՝ Իրանի մշակույթի եւ իսլամական առաջնորդության նախարարի տեղակալ, կինոմատոգրաֆիայի աուդիովիզուալ կազմակերպության նախագահ Ռայեդ Ֆարիդզադեն։

ԱՆԻ ՎԱՐԴԱՆՅԱՆ