«Ափսոս, որ մեր հայ գործընկերները պաշտպանություն են փնտրում սպառնալիքի անմիջական աղբյուրի մոտ, դա նրանց ընտրությունն է»․ Շոյգու

ՌԴ Անվտանգության խորհրդի քարտուղար Սերգեյ Շոյգուն հայտարարել է, որ Հայաստանի ղեկավարության վերջին քայլերը, իր գնահատմամբ, հակասում են Ռուսաստանի հետ դաշնակցային հարաբերությունների ոգուն։ Նա ընդգծել է, որ հայկական կողմը, ըստ իրեն, փորձում է պաշտպանություն գտնել այն ուժերից, որոնք Մոսկվան դիտարկում է որպես սպառնալիքի աղբյուր, և հավելել, որ դա Հայաստանի իշխանությունների ընտրությունն է ու պատասխանատվությունը երկրի ապագայի համար։

Շոյգուն այս հայտարարությունները արել է Հավաքական անվտանգության պայմանագրի կազմակերպություն (ՀԱՊԿ) Անվտանգության խորհրդի քարտուղարների կոմիտեի նիստում՝ նշելով, որ կազմակերպության գնահատմամբ հիմնական վտանգները գալիս են ՆԱՏՕ-ից և «քաղաքակիրթ Եվրոպայի» երկրներից։ Նրա խոսքով՝ դաշինքը մտահոգված է արևմտյան ուղղությամբ ՆԱՏՕ-ի ռազմական և հետախուզական ակտիվության աճով՝ զորավարժությունների թվի ավելացմամբ, ենթակառուցվածքների զարգացմամբ և ընդհանուր ռազմական ներուժի ուժեղացմամբ։

Ռուսաստանցի պաշտոնյան նաև ընդգծել է, որ ՀԱՊԿ-ը փորձում է համարժեք արձագանքել այդ ռիսկերին և ձեռնարկում է քայլեր դրանք նվազեցնելու համար։ Միևնույն ժամանակ հիշեցվում է, որ Հայաստանը փաստացի սառեցրել է իր մասնակցությունը ՀԱՊԿ-ին և վերջին շրջանում չի մասնակցում կազմակերպության միջոցառումներին։