Եվրասիական միության հիմնադիր անդամ Ղազախստանի նախագահ Նուրսուլթան Նազարբաևի հայտարարությունը, թե Հայաստանը Եվրասիական միությանը կարող է անդամակցել միայն ՄԱԿ-ի կողմից ճանաչված սահմաններով, այսինքն` առանց ԼՂ-ի, շարունակվում է բուռն քննարկվել Հայաստանի հասարակական-քաղաքական շրջանակներում:
ՀՀԿ պատգամավոր Լեռնիկ Ալեքսանյանը կարծում է, որ Հայաստանը որոշում է կայացրել մտնել Մաքսային միություն, սակայն ԼՂ խնդիրն այլ հարց է: Պատգամավորը վստահ է` Եվրասիական միություն մտնելը չի խոչընդոտի Արցախի խնդրի լուծմանը:
Քաղաքական գործչի խոսքով` մտնելով Եվրասիական միություն՝ Հայաստանն իր իրավունքների որոշակի մասը զիջում է՝ ընդհանուր միության տված իրավունքներից օգտվելու համար:
Լեռնիկ Ալեքսանյանի ընդդիմախոս, տնտեսագետ Վարդան Բոստանջյանն էլ ասաց, որ կարելի էր չմասնակցել Եվրասիական տնտեսական միության բարձրագույն խորհրդի նիստին: Տնտեսագետին զայրացրել է Ղազախստանի նախագահի հայտարարությունը, որը, նրա խոսքով, մեղմ ասած, առաջացրեց զզվանք հայ ժողովրդի մոտ:
«Ես կոչ եմ անում շատ հայհոյանքներ չուղղել նրան: Մեր բոլորի համար դա վիրավորական հայտարարություն էր»,- ասաց Բոստանջյանը:
Armlur.am-ին հարցին` պետք է Սերժ Սարգսյանն անմիջապես պատասխաներ Նազարբաևին, պատասխանեց. «Այո՛, կարծում եմ պետք է պատասխաներ»,- ասաց Վարդան Բոստանջյանը:
Տնտեսագետը, կողմ լինելով Եվրասիական միության անդամակցությանը, այնուամենայնիվ, կարծում է, որ այս համակարգը Հայաստանի շահերը ստորադասում է:
Սոնա Դավթյան
.gif)
