Վարդենիսի քաղաքապետի ընտրություններում գրանցված կեղծիքների առթիվ հարցաքննվել է թեկնածուն

ArmLur.am-ն արդեն գրել էր, որ Գեղարքունիքի մարզային դատախազությունում քրեական գործ է հարուցվել հոկտեմբերի 2-ին Վարդենիսի քաղաքապետի ընտրությունների ժամանակ տեղի ունեցած խախտումների մասով: Բանն այն է, որ Վարդենիսի բնակիչներից շատերը բողոքել են, թե այդ օրը գնացել են ընտրությունների, սակայն իրենց անվան դիմաց արդեն ստորագրված է եղել:

Այս առնչությամբ  ArmLur.am-ը զրուցեց Գեղարքունիքի մարզի Վարդենիսի քաղաքապետի թեկնածու Կարեն Մկրտչյանի հետ:

–Պարո´ն Մկրտչյան,  իրավապահները քննություն են սկսել հոկտեմբերի 2-ի ՏԻՄ ընտրություններում տեղի ունեցած ընտրակեղծարարության առթիվ:  Այդ օրերին Դուք որևէ կեղծարարություն նկատե՞լ եք:

– Դատախազությունն այն կառույցն է, որ ստից տեղ քրեական գործ չի հարուցում: Մնում է տեսնենք՝ իրավապահ մարմիններն իրենց գնահատականը կտան: Ի սկզբանե շատ մարդկանց եմ կասկածել, որոնց մասնակցությունը շատ մեծ է եղել: Ինչքան տեղեկացված եմ դատախազությունը փաստեր  ունի, որ քաղաքացին մոտեցել է արդեն իր անվան դիմաց ստորագրությունը դրված է եղել: Վարդենիսում էլ շրջանառվող լուրեր կան, որ ինչ-որ ընտրակեղծիքներ են եղել, մամուլն էլ գրել էր այդ մասին: Այս պահին նպատակահարմար չեմ գտնում մանրամասնել,  իրավապահներն իրենց գնահատակնները կտան:

-Ձեզ իրավապահները կանչե՞լ են հարցաքննության:

-Գործը, որ դեռ չէր տեղափոխվել Քննչական կոմիտե, ինձ կանչել՝  հարցաքննել են: Ամեն դեպքում, կոնկրետ հիմա անձնավորված չի, որ ասեմ այս ինչ մարդը կամ թեկնածուն կեղծիք է արել, այդպիսի բան չեմ ասում: Ընդամենը քվեատուփերը բացեն, զննեն,  իրավապահ մարմիններն իրենց գնահատականը տան:

-Այսինքն՝ Դուք վստա՞հ եք, որ կեղծարարություններ, այնուամենայնիվ,  եղել են: 

-Ես ասեցի կան շրջանառվող լուրեր, կասկածներ: Ես էլ արդեն ներքին համոզմունք ունեմ, որ ինչ-որ բան այն չէ, բայց կոնկրետ, երբ իրավապահ մարմինները քննությունն ավարտեն, ես այդ ժամանակ ավելի կմանրամասնեմ:

Լիդա Եղիազարյան