15 ՏԱՐԻ՝ ԱՌԱՆՑ ՎԱՐԴՈՒՀԻ ՎԱՐԴԱՆՅԱՆԻ

Հոկտեմբերի 15-ին սիրված երգչուհի Վարդուհի Վարդանյանի մահվան 15-րդ տարելիցն էր: Երգչուհին 15 տարի առաջ մահացել  էր ավտովթարի հետեւանքով, երբ ընդամենը 30 տարեկան էր:

Երգչուհու մտերիմ ընկերներն այսօր կիսվել են նրա լուսանկարներով եւ կարոտալի խոսքեր գրել:

Վարդուհի Վարդանյանին կարոտով եւ հուզիչ խոսքերով հիշել են ամերիկաբնակ երգչուհի Արմինկան, Հռիփսիմե Հակոբյանը, Արմեն Պետրոսյանը, Սիրուշոն եւ Քրիստինե Պեպելյանը:

Նշենք, որ Վարդուհի Վարդանյանն իր անցած կարճ ճանապարհին  հասցրել է մասնակցել մի շարք հեղինակավոր մրցույթ-փառատոնների: Նա Հայաստան է բերել 8-ից ավելի միջազգային բարձրագույն մրցանակներ ու պատվոգրեր:

1994-ին Նա Ջազ-Փոփ համույթի հետ մասնակցել է Սվերդլովսկի «Ասուպ» երաժշտական մրցույթին եւ արժանացել «Գրան-Պրի»-ի:

1996-ին մասնակցել է «Յալթա Մասկվա տրանզիտ» երիտասարդ կատարողների մրցույթին եւ արժանացել է հատուկ մրցանակի: 1999-ին «Ազգային Երաժշտական Մրցանակաբաշխության» շրջանակներում Վարդուհին արժանացել է «Հայաստանի լավագույն երգչուհի» կոչմանը: 1999-ին մասնակցել է Բելոռուսի «Զալատոյ Շլյագեր» մրցույթին, ուր արժանացել է երկրորդ մրցանակին: 2000-ին Մակեդոնիայի եւ Բուլղարիայի «Սլավյանսկիյ Բազառ» եւ «Դիսքավրի» մրցույթներում արժանացել է երկրորդ տեղերին:

Նույն թվականին Մակեդոնիայում կազմակերպվել է մրցույթ բոլոր «Գրան-Պրի» մրցանակակիրների միջեւ, ուր Վարդուհին արժանացել է առաջին մրցանակին, իսկ «Մորիե Դռուզեյ» մրցույթում նա երկրորդն էր: 1997-ին Վարդուհին ամուսնացել է:

2003-ին Վարդուհին թողարկել է իր անդրանիկ եւ միակ ձայնասկավառակը՝ «Խառնաշփոթը», ուր ներգրավվել են նրա ճանաչված հիթերից 13-ը: Դրանցից մի մասի հիման վրա նկարահանվել է տեսահոլովակ: 2004-ին Վարդուհին ավարտել է գործունեությունը Երգի պետական թատրոնում եւ սկսել է դասավանդել թատրոնին կից ստուդիայում:

2006-ի հոկտեմբերի 14-ին երգչուհին  նոր համերգաշարով պիտի մեկներ Մարտունի, սակայն Մարտունիից վերադարձի ժամանակ մառախուղի ու անձրեւների հետեւանքով անանցանելի դարձած ճանապարհին Վարդուհին չի նկատում շրջադարձն ու Սեւան-Մարտունի-Գետափ մայրուղու 17-րդ կիլոմետրի վրա մեքենան կորցրել է կառավարումն ու շրջվել: Մեքենայի ուղեւորներ Եղիշե Վերդյանն ու Արման Խաչատրյանը տարբեր աստիճանի մարմնական վնասվածքներով տեղափոխվել են հիվանդանոց, իսկ Վարդուհու կյանքը փրկել չի հաջողվել:

2006-ին «Ազգային երաժշտական մրցանակաբաշխության» ժամանակ Վարդուհուն հետմահու շնորհվել է «Հայաստանի լավագույն երգչուհու» կուչում:

Նույն թվականին «Ազգային երաժշտական մրցանակաբաշխության» կոմիտեի որոշմամբ՝ սահմանվել է Վարդուհու անվան ամենամյա հատուկ մրցանակ:

2006-ին հիմնադրվել է «Վարդուհի Վարդանյան» հիմնադրամը, որի միջոցներով կյանքի են կոչվում Վարդուհու անավարտ գործերը:

ԼԻԴԱ ԵՂԻԱԶԱՐՅԱՆ