Թուրքիայի նախագահ Ռեջեփ Թայիփ Էրդողանը հայտարարել է, որ կան խմբեր, որոնք ցանկանում են «թունավորել» Անկարայի և Վաշինգտոնի հարաբերությունները։
«ՌԻԱ Նովոստի»-ի փոխանցմամբ՝ Էրդողանը ելույթ է ունեցել Նյու Յորքում Թուրք-ամերիկյան ազգային ղեկավար կոմիտեի (TASC) կազմակերպած ընթրիքի ժամանակ՝ ՄԱԿ-ի Գլխավոր ասամբլեային իր մասնակցության շրջանակներում։
«Այստեղ պահպանելով ձեր ինքնությունը՝ դուք (ԱՄՆ-ում ապրող թուրքերը) կամուրջներ եք կառուցում մարդկանց միջև՝ ծանոթացնելով ամերիկացիներին մեր մշակույթին։ Հաղթանակի ճանապարհն անցնում է միասնությամբ, համերաշխությամբ։ Կան շահագրգիռ խմբեր, որոնք ցանկանում են թունավորել թուրք-ամերիկյան հարաբերությունները։ Մենք նրանց համար պատնեշ ենք դնելու»,- ասել է Թուրքիայի ղեկավարը։
Էրդողանը նշել է, որ Անկարայի ու Վաշինգտոնի հարաբերություններն ամեն օր բարելավվում են։ Նրա խոսքով՝ ինքն ԱՄՆ նախագահ Ջո Բայդենի հետ պայմանավորվել է շարունակել «ամրապնդել բարեկամությունն ու համագործակցությունը»։
Ավելի վաղ Թուրքիայի ղեկավարը Վիլնյուսում կայացած գագաթնաժողովում ԱՄՆ նախագահ Ջո Բայդենի հետ հանդիպման ժամանակ հայտարարել էր Անկարայի և Վաշինգտոնի հարաբերություններում նոր փուլի մասին։
Օֆելյա Հովհաննիսյան
.gif)
