Երեկ՝ վաղ առավոտից, ՀՀ Ազգային ժողովի մոտ էին հավաքվել հասարակական տարբեր խմբերի ներկայացուցիչներ՝ իրենց ակցիայով փորձելով կանխել «պետական դավաճանությունը»՝ պատգամավորներից պահանջելով դեմ քվեարկել պայմանագրին (էջ 4):
Նկատենք, որ հավաքված երիտասարդները չունեին առաջնորդ, նրանք պարզապես դուրս էին եկել փողոց եւ -11 աստիճան ցրտին պայքարում էին հանուն մեր երկրի ինքնիշխանության:
ՀՀ ԱԱ նախկին նախարար Դավիթ Շահնազարյանը հրապարակավ հուսադրեց. «Հայաստանում իրավիճակ է փոխվելու: Արագ չի լինելու, բայց ազատվելու ենք այս իշխանություններից: Այս իշխանություններն արդեն մեր հասարակությանը դրդում են ապստամբության»: Կենտրոնական բանկի նախկին նախագահ Բագրատ Ասատրյանն էլ նկատեց. «Եթե կա մի ընկերություն, որն ունի պարտքեր, թող սնանկ ճանաչվի, ինչո՞ւ ես եւ դու պիտի վճարենք այդ պարտքերի համար»:
Ազգագրագետ Հրանուշ Խառատյանն առաջարկեց կոնկրետ լուծում. ՀՀ օրենքով նախատեսված դավաճանության հոդվածները պետք է կիրառել համաձայնագրին կողմ քվեարկած պատգամավորների նկատմամբ. «Ցանկացած քաղաքացի իրավունք ունի օրենքը դավաճանի նկատմամբ կիրառել: Սա ազգային եւ պետական դավաճանություն էր»:
Ակցիային մասնակցում էին նաեւ մշակույթի եւ շոու բիզնեսի ներկայացուցիչներ, հեռուստահաղորդավարներ Ժակն ու Լուլուն, Հայկ Մարությանը՝ Կարգին Հայկոն, որը Պրահայից հատուկ Հայաստան էր եկել այս ակցիայի համար: Նա իր հետ ԱԺ-ի մոտ էր բերել նաեւ գազի բալոն՝ հայտարարելով, որ դրա մեջ իրանական գազ է լցրել։
Երբ հավաքվածներին միացավ «Ազգային համաձայնություն» կուսակցության նախագահ Արամ Հարությունյանը, ակտիվիստները սկսեցին գոռալ՝ հեռացի՛ր. «Դու այստեղ անելիք չունես, մենք հավաքվել ենք պահանջելու քո տիրոջ հրաժարականը»: Նրանք նկատի ունեին ամեն ընտրություններին Արամ Հարությունյանի առաջադրվելը եւ կոնսոլիդացիան փչացնելը:
Հետաքրքիր էր, բայց նույն կերպ սուլոցներով դիմավորեցին նաեւ ՀՅԴ խմբակցության ղեկավար Արմեն Ռուստամյանին, որը կոչ արեց համաձայնեցված գործել եւ իրար հակասող բաներ չանել: «Առաջին անգամ է ստեղծվել լուրջ հնարավորություն, ոչ իշխանական քաղաքական ուժերով մշակված ծրագրով գնալու ենք առաջ: Ինչ արել ենք, ճիշտ ենք արել: Շարունակությունը կտեսնեք»,-ասաց Ռուստամյանը, ում ի պատասխան՝ մարդիկ բղավեցին՝ «վստահություն չունենք, գնա՛ ստեղից»՝ պահանջելով վայր դնել նաեւ պատգամավորական մանդատները:
Մինչդեռ խորհրդարանում ներկայացված որեւէ ուժ կամ անհատ պատգամավոր այդպես էլ չհամաձայնեց վայր դնել մանդատը՝ պնդելով, որ իրենք ներսում ավելի շատ գործ են անում:
.gif)
