Պետք է ժողովրդին համոզել, որ որ ազգի հույսը միայն Երևանը չէ. Հովհ. Մանուկյան (ֆոտո)

Հոկտեմբերի 18-ին Գյումրիի Քաղաքացիական կացության ակտերի գրանցման տարածքային բաժնում տեղի ունեցավ ՔԿԱԳ  էլեկտրոնային համակարգի ներդրման  շնորհանդես: Միջոցառմանը ներկա էին ՀՀ արդարադատության նախարար Հովհաննես Մանուկյանը, նրա  տեղակալ Սուրեն Քրմոյանը, Հայաստանում Եվրոպական միության պատվիրակության ղեկավար, դեսպան Տրայան Հրիսթեան և այլք:

ՀՀ կառավարությունն այս ծրագիրը մշակել է  Եվրոպական միության աջակցությամբ:

Ուղիղ մեկ տարի առաջ Գյումրիում մեկնարկեց  Քաղաքացիական կացության ակտերի գրանցման էլեկտրոնային համակարգի պաշտոնական գործարկումը: Գյումրի  քաղաքից  հետո միայն ծրագիրն իրականացվեց մայրաքաղաք Երևանում, իսկ ահա 2014թ. սեպտեմբերի 30-ից, ԱԺ-ի որոշմամբ, ծրագիրն արդեն պարտադիր է  ՀՀ բոլոր մարզերում: Համակարգի միջոցով իրականացվում են ծննդի, որդեգրման, հայրության ճանաչման, մահվան, ամուսնության, ամուսնալուծության, անվանափոխության և տեղեկանքների տրամադրման գործընթացները, ինչպես նաև՝ քաղաքացիներն այլևս ազատվում են  լրացուցիչ դիմումներ տալու քաշքշուկից:

Թե ինչու ծրագրի մեկնարկը տրվեց Գյումրիից, նախարար Հ. Մանուկյանը կատակեց.«Իսան ուրդից կեղնե….»: Իսկ ավելի լուրջ իր խոսքում նշեց, որ Գյումրին ունի լուրջ ուշադրության կարիք, պետք է ժողովրդին համոզել, որ ազգի հույսը միայն Երևան քաղաքը չէ, այլ Հանրապետության երկրորդ, երրորդ քաղաքները ևս:

Գյումրիի  քաղաքապետ Սամվել Բալասանյանն էլ բոլոր գյումրեցիների անունից շնորհակալություն հայտնեց դեսպան  Տրայան Հրիսթեանին և նախարար Հ. Մանուկյանին՝ նշելով, որ նախարարը ծնունդով գյումրեցի է, և հուսով է, որ  այսուհետ բոլոր նախագծերի մեկնարկը տրվելու է Գյումրի քաղաքից:

Դեսպան Տրայան Հրիսթեան իր ելույթում ընդգծեց, որ համակարգը հնարավոր է դարձրել քաղաքացիական կացության ակտերի գրանցումը իրականացնել մեկ պատուհանի սկզբունքով, ինչը նվազեցնում է նաև հնարավոր կոռուպցիոն ռիսկերը:

Միջոցառման ավարտին ՀՀ արդարադատության նախարար Հովհ. Մանուկյանը դեսպան Տրայան Հրիսթեանին  ՀՀ կառավարության անունից պարգևատրեց «Շահամիր Շահամիրյանի անվան» արդարադատության հուշամեդալով:

Արևիկ Հակոբյան

Գյումրի