«Կամուրջ» ունիվերսալ վարկային կազմակերպության մի խումբ աշխատակիցներ վրդովված զանգահարել էին «Ժողովուրդ»-ին եւ խնդրում էին օգնել իրենց հասկանալ, թե տվյալ կազմակերպությունն ինչու իրենց կարծիքը հաշվի չի առնում: Ու հատկապես իրենց տնօրենը, որը, հայտարարվում է, թե մի օր ղեկավարում է կազմակերպությունը, իսկ հաջորդ օրը` ոչ: Կազմակերպության բողոքող աշխատակիցները նաեւ նշեցին, որ իրենց ղեկավարությունը ստիպել է բաց նամակ գրել Սերժ Սարգսյանին եւ խնդրել, որ կազմակերպությունը ղեկավարի Գագիկ Վարդանյանը:
Ըստ վարկային կազմակերպության աշխատակիցների` կազմակերպությունում դեռեւս «նոյի թիվ» ասվածն է: «Մի ղեկավար ունենք` Գագիկ Վարդանյան, մի քանի ամիս առաջ մենք իմացանք, որ ունենք հոգաբարձուների խորհուրդ, որի նախագահը Վարդան Արամյանն է` ֆինանսների փոխնախարարը, իրանք ժողով հրավիրեցին ու հեռացրին մեր տնօրենին, պատճառաբանեցին, որ իրենք մի քանի անգամ առաջարկել են քննարկել աշխատակիցների աշխատավարձերի մասին կարգը եւ այդ պրոբլեմային խմբերի ընթացակարգը, սակայն Վարդանյանը շարունակել է անել այնպես, ինչպես իրեն է հարմար»:
Վարկային կազմակերպության աշխատակիցները հավելեցին, որ ընդամենը մի անգամ են իրենց «մարդատեղ» դրել` ժողով են հրավիրել` տեղեկացնելով, որ տնօրեն Գագիկ Վարդանյանին հեռացնում են: «Հետո ասացին, որ Սերժ Սարգսյանին նամակ են գրում, որ ինքը մնա իր պաշտոնին, մեզ էլ ստիպեցին, որ ստորագրենք: Մենք մտածեցինք` դե մարդն էսքան տարի աշխատել է, միգուցե մեր ստորագրություններից հետո կփորձի իր աշխատակիցների պայմանները բարելավել: Ստորագրելուց հետո մեզ անգամ չասացին` նա մնում է այդ պաշտոնում, թե ոչ: Նոր ենք միայն իմանում, որ այլեւս չկա հոգաբարձուների խորհուրդը, որի հետեւանքով էլ հիմա կազմակերպությունում չեն իրականացվում տարեկան հաշվետվություններ, հավաքներ, ու տենց էլ չենք հասկանում` ի՞նքն է մեր տնօրենը, թե՞ չէ»,-նշեցին կազմակերպության աշխատակիցները:
Վարկային կազմակերպության աշխատակիցների խոսքով, եթե իրենք որեւէ խմբի վարկ են տալիս, չեն ստուգում՝ տվյալ խումբն այլ տեղերում վարկեր ունի, թե ոչ. «Ռիսկայնությունն ամբողջովին ընկնում է աշխատողի վրա, իսկ եթե այդ մարդը գումարը չի փակում, մեծ պահումներ են լինում նաեւ գործակալից»: Աշխատակիցները հավելեցին, որ դեպքեր են եղել, իրենք են այդ գումարները մուծել, ինչի համար էլ կազմակերպությունը գերշահույթ է ստանում:
Մեզ դիմած աշխատակիցները նշեցին, որ տնօրինությունը ցանկանում է ստեղծել նոր աշխատանքային թիմ, որոնք անփորձ են եւ հարմարվում են կազմակերպության ղեկավարության ցանկացած «քմահաճույքի»: Մինչդեռ իրենք աշխատում են անդադար, անգամ ժամանակ է լինում, որ ծանրաբեռնվածության պատճառով ընդմիջման էլ չեն կարողանում դուրս գալ:
Մենք փորձեցինք հենց «Կամուրջ» ունիվերսալ վարկային կազմակերպության տնօրեն Գագիկ Վարդանյանից տեղեկանալ, թե ինչ է կատարվում իրականում: Վերջինս ասաց, որ շատ զբաղված է, եւ միայն մի քանի օր անց կարողացանք նրանից գրավոր պատասխան ստանալ:
Վարդանյանը նշել է. «Մեր կազմակերպությունը` որպես ՍՊԸ, հոգաբարձուների խորհուրդ չունի եւ գործող օրենսդրության համաձայն` չի կարող ունենալ, ձեզ տրամադրված տեղեկատվությունն ակնհայտորեն չի համապատասխանում իրականությանը»:
Իսկ կազմակերպության ներքին կանոնակարգի եւ իր աշխատակազմի բողոքների վերաբերյալ նշել է. «Կարծում եմ` ավելի լավ է խոսել փաստերով, ներկայումս աշխատում են մոտ 170 աշխատողներ, եւ մինչ այսօր աշխատանքից ազատվել է 16 հոգի, որոնց մեծ մասը վարորդներ են: Նրանց աշխատանքի կարիքն ունի սեզոնային բնույթ: Պետք է ուղղակի համեմատել աշխատակազմի այս խիստ ցածր ցուցանիշը նման ոլորտում գործող ցանկացած այլ կազմակերպությունների ցուցանիշների հետ: Կարծում եմ` այս կազմակերպությունում աշխատելու մասով աշխատակազմի բավարարվածության ու երկարատեւ աշխատելու ցանկության այլ ապացույցի կարիք չկա»:
Ի վերջո, կազմակերպության ղեկավարը խուսափեց բացատրել, թե ինչն է պատճառը, որ աշխատակիցներին ստիպել են բաց նամակ գրել Սերժ Սարգսյանին:
Հ.Գ. Ի դեպ, փորձեցինք նաեւ մեկնաբանություն ստանալ ֆինանսների փոխնախարար Վարդան Արամյանից, մեզ տեղեկացրին, որ մինչեւ օրվա վերջ Արամյանը մեր հարցերին կպատասխանի, սակայն այդպես էլ չարձագանքեցին մեր հարցերին:
.gif)
