«Հատուկ լեռնափրկարար ծառայության» մեքենաները կտան ԱԻՆ-ին, բաժնեմասերն էլ կհանեն աճուրդի

«Հատուկ լեռնափրկարար ծառայություն» փակ բաժնետիրական ընկերության տրանսպորտային միջոցները կտրվեն Հայաստանի Հանրապետության արտակարգ իրավիճակների նախարարությանը: Միևնույն ժամանակ ArmLur.am-ը տեղեկացավ, որ  Հայաստանի Հանրապետության տարածքային կառավարման և ենթակառուցվածքների նախարարության պետական գույքի կառավարման կոմիտեի ենթակայության ընկերության՝ 297 մլն գնահատված ակտիվներ ունեցող (ընկերության գտնվելու վայրն է՝ ք. Երևան, Դավթաշեն, 4-րդ թաղ., Ա. Միկոյան 109/8) 100 տոկոս պետական սեփականություն հանդիսացող բաժնետոմսերը  մասնավորեցվելու է որպես ամբողջական մեկ միավոր՝ դասական աճուրդով:

Ընդ որում, ընկերության պետական բաժնետոմսերի աճուրդով մասնավորեցման մեկնարկային գինը կազմում է  275 մլն դրամ:  Ընկերության գնահատված պարտավորությունները 2022 թվականի օգոստոսի 1-ի  դրությամբ կազմել են 20 մլն դրամ:  Աճուրդի մասնակցության նախավճարը սահմանվում է աճուրդով մասնավորեցման ենթակա գույքի մեկնարկային գնի 5 տոկոսի չափով: Գնորդի կողմիցմուծված նախավճարը ներառվում է առաջարկվող գնի մեջ։

Հիշեցնենք, որ դեռ 2021 թվականին խորհրդարանը հավանություն էր տվել «Հատուկ լեռնափրկարար ծառայության» մասնավորեցման ծրագրին: Հիմնավորման մեջ նշվել էր, թե մասնավորեցման արդյունքում ինչ-որ չափով կնվազի ընկերության՝ որպես պետական կառույցի գերիշխող դիրքը ոլորտում, որի հետևանքով կստեղծվեն լեռնափրկարար ծառայություն մատուցող կազմակերպություններ, ծառայության մատուցումը կդառնա մրցակցային, խթան կհանդիսանա ավելի մատչելի և որակյալ ծառայության մատուցման համար:

Ն.Հ.