ՆԱՏՕ-ի գլխավոր քարտուղարը հայտարարել է, որ եվրոպացիները «ստացել են Թրամփի ուղերձը» պաշտպանության վերաբերյալ

Մարկ Ռյուտեն հայտարարել է, որ եվրոպական առաջնորդները «լսել և հասկացել են ուղերձը», այն բանից հետո, երբ Միացյալ Նահանգների նախագահ Դոնալդ Թրամփը հայտարարել է Գերմանիայից մոտ 5000 ամերիկացի զինծառայողների դուրսբերման ծրագրերի մասին։

Ռյուտեն, ելույթ ունենալով European Political Community գագաթնաժողովից առաջ, նշել է, որ ԱՄՆ-ի կողմից կա որոշակի «հիասթափություն» դաշնակիցների գործողություններից, սակայն Եվրոպան այժմ պետք է ավելի մեծ դեր ստանձնի ՆԱՏՕ-ում։

«Եվրոպական առաջնորդները ստացել են ուղերձը։ Նրանք այն լսել են բարձր և հստակ։ Եվրոպացիները մեծացնում են իրենց դերը՝ ավելի ուժեղ Եվրոպա և ավելի ուժեղ ՆԱՏՕ», — ասել է նա։

ԱՄՆ Պենտագոնը ուրբաթ հայտարարել էր Գերմանիայից զորքերի կրճատման մասին՝ մի քանի օր անց այն բանից հետո, երբ Գերմանիայի կանցլեր Ֆրիդրիխ Մերցը հայտարարել էր, թե Իրանը բանակցությունների ընթացքում նվաստացնում է ԱՄՆ-ին։

Եվրոպական միության արտաքին քաղաքականության ղեկավար Կայա Կալասը զորքերի դուրսբերման ժամկետը անվանել է «անակնկալ»՝ ընդգծելով, որ Եվրոպան պետք է ավելի ամրապնդի իր պաշտպանական բաղադրիչը ՆԱՏՕ-ում։

Նրա խոսքով՝ ամերիկյան ուժերը Եվրոպայում չեն տեղակայված միայն եվրոպական, այլ նաև հենց ԱՄՆ շահերը պաշտպանելու համար։

Միաժամանակ ՆԱՏՕ-ի ներկայացուցիչները հայտնել են, որ դաշինքը բանակցում է Վաշինգտոնի հետ՝ հասկանալու Գերմանիայում ուժերի տեղակայման փոփոխությունների մանրամասները։

Վերջին շաբաթներին Եվրոպայում քննադատությունը սրվել է Իրանի դեմ ռազմական գործողությունների շուրջ՝ հատկապես այն պատճառով, որ հակամարտությունը խաթարում է համաշխարհային տնտեսությունը և ազդում է ծովային երթևեկության վրա Հորմուզի նեղուցում։

Գերմանիայի կանցլերը հակամարտությունը համեմատել է Իրաքի և Աֆղանստանի պատերազմների հետ՝ նշելով, որ այն ստեղծում է բարդ և ծախսատար իրավիճակ Եվրոպայի տնտեսության համար։

Իսպանիայի կառավարությունը հրաժարվել է թույլ տալ, որ ԱՄՆ-ն իր օդային տարածքից կամ ռազմակայաններից հարձակումներ իրականացնի Իրանի դեմ՝ այն համարելով «անարդարացված և վտանգավոր ռազմական միջամտություն»։

Ի պատասխան՝ ԱՄՆ նախագահ Թրամփը Իսպանիան բնութագրել է որպես «վատ գործընկեր» և սպառնացել սահմանափակել առևտրային հարաբերությունները։

Չնայած այդ լարվածությանը, Ռյուտեն նշել է, որ եվրոպական մի շարք երկրներ արդեն նախապատրաստում են ռազմածովային միջոցներ՝ հնարավոր հաջորդ փուլերին պատրաստ լինելու համար, սակայն մանրամասներ չի ներկայացրել։

Անի Վարդանյան