«Ժողովուրդ» օրաթերթը գրում է. ««Ժողովուրդ» օրաթերթը ՀՀ վարչապետ Նիկոլ Փաշինյանին էր ուղղել հարցում՝ փորձելով պարզել, թե Բիշքեկում Ադրբեջանի նախագահ Իլհամ Ալիևի հետ հանդիպման ընթացքում արդյոք քննարկվել են Ադրբեջանում պահվող հայ գերիների նկատմամբ հնարավոր խոշտանգումների և անմարդկային վերաբերմունքի վերաբերյալ ահազանգերը։
Հարցման հիմքում ՄԻԵԴ-ում հայ գերիների շահերի ներկայացուցիչ, իրավապաշտպան Սիրանուշ Սահակյանի՝ սեպտեմբերի 4-ի մամուլի ասուլիսում հրապարակած տեղեկություններն էին։ Սահակյանը, մասնավորապես, հայտնել էր գերիների նկատմամբ ֆիզիկական բռնության, կոտրվածքների, խաչի տեսքով դաջվածքներն այրելու, Ղուրան կարդալ հարկադրելու և Աստվածաշունչ փոխանցելն արգելելու դեպքերի մասին։
«Ժողովուրդ»-ը վարչապետից հետաքրքրվել էր՝ արդյոք այս կոնկրետ տեղեկությունները բարձրաձայնվել են Ալիևի հետ հանդիպման ժամանակ, ի՞նչ պատասխան է տվել Ադրբեջանի նախագահը, ինչո՞ւ մինչ օրս չեն վերադարձվում հայ գերիները, և արդյոք ՀՀ կառավարությունը պատրաստվում է պահանջել միջազգային անկախ կառույցների ու բժիշկների անարգել մուտքը նրանց մոտ։
Սակայն վարչապետին հասցեագրված հարցմանը պատասխանել է ՀՀ արտաքին գործերի նախարարությունը՝ ըստ էության չանդրադառնալով բարձրացված յոթ հարցերից յուրաքանչյուրին առանձին։
ԱԳՆ պատասխանում նշվում է.
«Բաքվում պահվող հայ գերիների խնդիրների հանգուցալուծման ուղղությամբ աշխատանքները շարունակական են»։
Միաժամանակ նախարարությունը հղում է անում վարչապետի՝ սեպտեմբերի 5-ին լրագրողների հետ ճեպազրույցում արած հայտարարությանը՝ մեջբերելով. «Թեման օրակարգում է, մանրամասներ չի կարող հայտնել, որովհետև տվյալ թեմայով հրապարակայնությունը որևէ կերպ չի կարող օգուտ տալ»։
Այսպիսով՝ պաշտոնական պատասխանից պարզ չի դառնում՝ Փաշինյանն Ալիևի հետ քննարկե՞լ է հենց խոշտանգումների մասին կոնկրետ ահազանգերը, Ալիևն ի՞նչ է պատասխանել, և հայկական կողմը պատրաստվո՞ւմ է պահանջել գերիների անկախ բժշկական զննություն ու միջազգային կառույցների մուտք։
Ավելին՝ հրապարակային աղբյուրներում Փաշինյանի խոսքը վերաբերում է ընդհանուր առմամբ գերիների և անհետ կորածների հարցին. նա հայտարարել է, որ Բիշքեկի հանդիպման ժամանակ դրանք քննարկման մաս են կազմել, սակայն մանրամասներ չի հայտնել՝ պատճառաբանելով, որ հրապարակայնությունը կարող է չօգնել գործընթացին։
Ստացվում է՝ «Ժողովուրդ»-ի հարցման առանցքային՝ գերիների նկատմամբ հնարավոր խոշտանգումների վերաբերյալ կոնկրետ հարցերը պաշտոնական պատասխանում մնացել են անպատասխան»։
Մանրամասները՝ «Ժողովուրդ» օրաթերթի այսօրվա համարում:
.gif)
