ՄԱՐԶԱԿԱՆ ԽԱՉՄԵՐՈՒԿ

ՍՊԱՍԵՆՔ ՄԻՆՉԵՎ ԵՐԿՈՒՇԱԲԹԻ

Ֆուտբոլի Հայաստանի ազգային հավաքականի եւ Դորտմուդի «Բորուսիա»-ի կիսապաշտպան Հենրիխ Մխիթարյանը ֆուտբոլի Չեմպիոնների լիգայի խմբային փուլի 6-րդ տուրի` Մարսելի «Օլիմպիկ»-«Բորուսիա» խաղում (1:2) շատ ակտիվ էր եւ մեծ ներդրում ունեցավ իր թիմի հաղթանակի մեջ:
Հիշեցնենք, որ Հենրիխն իր մանկությունն անցկացրել է Ֆրանսիայի հարավում, եւ հենց դրա ու, իհարկե, նաեւ վճռական հանդիպման մասին իր տպավորություններն է կիսել ֆրանսիական «20 minutes» օրաթերթին տված հարցազրույցում: Նա մասնավորապես ասել է. «Առաջին անգամ էր, երբ ես Չեմպիոնների լիգայի հանդիպում էի անցկացնում Ֆրանսիայում, եւ դա ինձ մեծ երջանկություն պարգեւեց: Ինչ վերաբերում է խաղին, ապա մենք մինչեւ վերջ պայքարում էինք եւ վերջին րոպեին կարողացանք գոլի հեղինակ դառնալ: Շատ ուրախ ենք դրա համար: Իսկ Մարսելի «Օլիմպիկ»-ը շատ լավ թիմ է, եւ ես չեմ հասկանում, թե ինչպես նրանք ոչ մի միավոր չեն վաստակել Չեմպիոնների լիգայի այս խաղարկությունում: Կարծում եմ՝ հաջորդ տարի նրանք ավելի ուժեղ կլինեն եւ կպայքարեն փլեյ-օֆֆի ուղեգրի համար»:
Այժմ ներկայացնենք, թե որ թիմերն են հաղթահարել խմբային փուլը։ Առաջին տեղով պայքարը շարունակելու են «Մանչեսթեր Յունայթեդ»-ը, Մադրիդի «Ռեալ»-ը, «Պարի Սեն Ժերմեն»-ը, «Բավարիա»-ն, «Չելսի»-ն, Մադրիդի «Ատլետիկո»-ն, Դորտմունդի «Բորուսիա»-ն, «Բարսելոնա»-ն։ Երկրորդ տեղով պայքարը կշարունակեն «Բայեր»-ը, «Գալաթասարայ»-ը, «Օլիմպիակոս»-ը, «Մանչեսթեր Սիթի»-ն, «Շալկե-04»-ը, «Արսենալ»-ը, «Զենիթ»-ը եւ «Միլան»-ը։
Իսկ ահա խմբում երրորդ տեղ զբաղեցրած թիմերը Եվրոպա լիգայի 1/16-ի ուղեգիր են ձեռք բերել։ Այդ թիմերն են՝ «Շախտյոր»-ը, «Յուվենթուս»-ը, «Բենֆիկա»-ն, «Վիկտորիա»-ն, «Բազել»-ը, «Նապոլի»-ն, «Այաքս»-ը, «Պորտու»-ն։
Հիշեցնենք, որ Չեմպիոնների լիգայի 1/8-րդ եզրափակիչ փուլի վիճակահանությունը տեղի կունենա երկուշաբթի՝ դեկտեմբերի 16-ին՝ Երեւանի ժամանակով 15:00-ին, Շվեյցարիայի Նիոն քաղաքում: Փուլի առաջին խաղերը կկայանան 2014թ. փետրվարի 18-ին, 19-ին, 25-ին եւ 26-ին, իսկ պատասխան խաղերը՝ մարտի 11-ին, 12-ին, 18-ին եւ 19-ին:

Ռ. ԹԱԹՈՅԱՆ