Երեկ ՀՀԿ-ն, ինչպես եւ խոստացել էր, բոյկոտեց ԱԺ արտահերթ նիստը: ԲՀԿ խմբակցության քարտուղար Նաիրա Զոհրաբյանն էլ հայտարարեց, թե իշխանությունները պարզապես վախեցել են: Այս առիթով «Ժողովուրդ»-ը զրուցեց ԱԺ ՀՀԿ խմբակցության ղեկավար Գալուստ Սահակյանի հետ:
-Պարո՛ն Սահակյան, ինչո՞ւ ՀՀԿ-ն փախավ ԱԺ արտահերթ նիստից:
-Մինչեւ հիմա բոլորը ՀՀԿ-ի կողքից են փախնում, այսինքն՝ թուլության գրավականը ոչ ազնիվ խոսքն է, եւ տրամաբանությունն էլ հենց նա էր, որ խոսելու մի դաշտ ստեղծեն, որի համար պատրաստ ենք:
-Եթե պատրաստ եք մի դաշտում խոսել, ապա ինչո՞ւ ՀՀԿ-ն չեկավ ու չմասնակցեց արտահերթ նիստին:
-Որովհետեւ հանրապետականները գտնում են, որ այդ ամենի քննարկումը ոչինչ չի տալու, նույնիսկ եթե ուզենան որեւէ բան փոխել, դա բավական լուրջ սցենար չէ: Այդ հսկայածավալ փոփոխությունները մոտավորապես 1-1,5 տարվա քննարկում են պահանջում: Այսինքն՝ խնդիրը հետեւյալն է, որ դաշտում ինչ-որ հարց է մտցվում, պետք է ակտիվորեն կարողանալ այդ հարցի քննարկման մոտեցումներով իրենց շահագրգիռ խոսքն ասել վարկաբեկելով, անվանարկելով: Ասում են՝ հանրապետականները փախան, հանրապետականները փախնո՞ղ են: Հենց իմ միտքն էլ էդ է, որ պետք է փախնեն հանրապետականներից: Կարեւորը՝ ժողովուրդը Հանրապետականից չի փախնում:
-Իսկ ո՞րն է պատճառը, որ ՀՀԿ-ից փախչում են, այդքան վա՞տն եք:
-Դե պարզվում է՝ ինչքան որ հնարավորինս համաձայնեցված, դաշինքներով, կոալիցիաներով ճանապարհ ենք գնում, ինչ-որ մի եզրագծի հասնելու ժամանակ, երբ գալիս է պատասխան տալու պահը, ՀՀԿ-ի կողքից փախնում են՝ մտածելով, որ ՀՀԿ-ն միայնակ կմնա: Այսինքն՝ հաշվարկները ոչ թե ժողովրդի վրա են դնում, իրենց հետագա գործունեության արդյունավետությունն են հաշվի առնում, այլ ՀՀԿ-ի:
-Այսինքն՝ կարելի՞ է եզրակացնել, որ Ձեր կոալիցիոն նախկին գործընկեր ԲՀԿ-ն էլ, ՀՀԿ-ի հետ ճանապարհ գնալով, կեսից «փախավ»:
-Չէ՛, մենք չենք ուզում որեւէ մեկին անվանարկել, ընդամենը հակադարձում ենք եւ շատ դիպուկ ենք հակադարձում: Այսինքն՝ եթե նորմալ իրենց քաղաքական գործունեությամբ զբաղվեն, ապա դա է քաղաքական դաշտի ճանապարհը: Մեկը մյուսի հաշվին երբեք չի կարող զարգանալ, դա անբնական ճանապարհ է:
-Բայց ՀՀԿ-ն, չմասնակցելով նիստին, օրենք է խախտում, դա հակասահմանադրական գործունեություն է:
-Իհարկե օրենք չի խախտում, իսկ ո՞վ ասաց, որ մենք պարտադրված ենք ցանկացած օրակարգի մեր մասնակցությունն ունենալու: Դա շոու է, իրենք չեն մտածում, որ այսօր ժողովրդին դա չի հետաքրքրում: Օրենքի թույլատրելի սահման գոյություն ունի: Նախ՝ յուրաքանչյուր պատգամավոր ինքն է որոշում, թե ինքն ինչ մասնակցություն է ունենում խորհրդարանում, պարզապես եթե կեսից ավելի է բացակայում, այստեղ արդեն խնդիր է առաջանում: Մենք մի շաբաթ է՝ կրկնում ենք, որ բոյկոտելու ենք, մենք ոչ թե չէինք ուզում չքննարկել, այլ դա անիմաստ քննարկում էր, որը հնարավոր կլինի օգտագործել երեւի 2017 թվականի խորհրդարանական ընտրությունների ժամանակ: Նման քննարկումները լինում են ընտրություններից մի քանի տարի առաջ:
-Հանրապետականները կարող էին, չէ՞, գալ ԱԺ ու լսել, թե ընդդիմությունն ինչ է ցանկանում անել, ի վերջո, պետք է նաեւ ընդդիմության խոսքը լսել:
-Ընդդիմությանը լսելու համար ճիշտ ժամանակ չէ: Մենք այժմ բավական լուրջ մեր կուսակցական աշխատանքներին ենք լծված, առավել եւս՝ երկու ընտրատարածքում, քանի որ դեկտեմբերի 2-ին ընտրություններ են: Մենք չենք ուզում վիրավորել, մենք ընդամենն ասում ենք, որ այդ օրակարգը ժամանակին չէ:
-Մեր նախորդ հարցազրույցում ԲՀԿ-ական պատգամավոր Արագած Ախոյանն ասել էր, որ իրենք Սերժ Սարգսյանի հետ խնդիր չունեն: Իսկ ՀՀԿ-ն ԲՀԿ-ի, Գ. Ծառուկյանի հետ խնդիր ունի՞:
-ԲՀԿ-ական այդ մեկ անձի հայտարարությունն իր անձնական կարծիքն է ու վերջ:
.gif)
