Եւս մեկ վիրավոր. նոր մանրամասներ՝ «Դոն Կիխոտ» ռեստորանի մոտ հնչած կրակոցներից տուժածների վիճակից

Ինչպես արդեն հայտնել ենք՝ Երևանի Շենգավիթ վարչական տարածքում օգոստոսի 25-ին հնչած կրակոցների հետևանքով Էրեբունի բժշկական կենտրոն է այսօր տեղափոխվել ևս մեկ վիրավոր: Այս մասին  ArmLur.am-ի հետ զրույցում ասաց «Էրեբունի» ԲԿ գործադիր տնօրեն Միքայել Մանուկյանը:

Նա նշեց, որ միջադեպի մասնակիցներից մեկին ոտքի հրազենային վնասվածքով այսօր տեղափոխել են Էրեբունի ԲԿ, իսկ մյուս վիրավորը, ով գտնվում էր վերակենդանացման բաժանմունքում այսօր տեղափոխվել է հիվանդասենյակ:

Միքայել Մանուկյանի խոսքով՝ հիվանդների կյանքին վտանգ չի սպառնում, այս պահի դրությամբ առողջական վիճակները կայուն են:

Նշենք, որ մահացածը թաղային հեղինակություն 43-ամյա Համբարձում Առաքելյանն է եղել։

Հավելենք, որ դեպքի առթիվ ՀՀ ՔԿ ԵՔՔՎ Շենգավիթ վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 34-104-րդ հոդվածի 2-րդ մասի 2-րդ եւ 6-րդ կետերով եւ 235-րդ հոդվածի 1-ին մասով: Քրեական գործով կատարված քննչական գործողությունների եւ օպերատիվ-հետախուզական միջոցառումների արդյունքում պարզվել է ենթադրյալ հանցագործություն կատարած անձի ինքնությունը, ով Երեւան քաղաքի բնակիչ է՝ ծնված 1975թ.: Վերջինս ձերբակալվել է:

Նշենք, որ ձերբակալված անձը «Դոն Կիխոտ» ռեստորանի տնօրենն է:

Լիդա Եղիազարյան