«ԼԱՎ ԵՄ ԱՐԵԼ` ԸՆԴՀԱՏԵԼ ԵՄ». ԱԼԼԱ ԼԵՎՈՆՅԱՆ

Անցած կիրակի Օպերայի եւ բալետի ազգային ակադեմիական թատրոնը լեփ- լեցուն էր. մենահամերգով հանդես եկավ երգչուհի Ալլա Լեւոնյանը: Մենահամերգը նշանավորվեց երկրպագուների մեծ հոսքով եւ զանազան իրադարձություններով, որոնք հասարակության կողմից տարբեր արձագանքների արժանացան: Համերգի խորագիրն էր` «Ճանապարհ» (20 տարի բեմում): Ալլա Լեւոնյանից բացի համերգին մասնակցեցին «Սասուն», «Բերդ» պարային համույթները, Նաիրա Գյուրջինյանի մանկական երգչախումբը, Արսեն Սաֆարյանը, Էդգար Գյանջումյանը: Համերգին ուշացումով ժամանած Ռիտա Սարգսյանին եւ Հասմիկ Պողոսյանին երգչուհին յուրօրինակ կերպով ընդունեց. ընդհատեց երգը եւ ողջունեց նորեկներին: Համերգից ստացած տպավորությունների մասին «Ժողովուրդ»-ը զրուցեց երգչուհի Ալլա Լեւոնյանի հետ:

-Ի՞նչ տպավորություններ ունեք համերգից: Արդարացա՞ն Ձեր սպասելիքները:
-Ավելին, քան արդարացան, ես շատ գոհ եմ, իմ երկրպագուներն ապացուցեցին, որ իրոք ինձ երկրպագում են: Մի բան պետք է ասեմ, վատ եմ զգում այն պատճառով միայն, որ կանգնած մարդիկ կային, տոմսերն ամբողջությամբ վաճառվել էին, բայց համերգիս ներկա գտնվելու ցանկություն ունեցողներն առավել քան շատ էին:
-Համերգի ընթացքում բազմաթիվ անակնկալներ, համերգային նորամուծություններ կային: Ձեր երկրպագուներն ականատես եղան, թե ինչպես կարող եք Ձեր երգը հանկարծակի ընդհատել եւ ողջունել ուշացումով եկած առաջին տիկին Ռիտա Սարգսյանին եւ մշակույթի նախարար Հասմիկ Պողոսյանին: Շատերի համար դա ոչ այդքան հաճելի անակնկալ էր:
-Անպայաման պետք է մի բիծ որոնե՞ք: Համերգը շատ լավ անցավ, ես շատ գոհ եմ արդյունքներից, հիանալի ստացված համերգ էր: Ամեն ինչ նախատեսվածից էլ լավ անցավ:Ես եմ որոշում` ում՝ երբ ողջունեմ, ինչպես արձագանքեմ, համերգիս ընթացքն ինչպես կառավարեմ: Իմ իրավասությունն է՝ երգս իմ ցանկացած պահի ընդհատել, ավելացումներ, լրացումներ անել: Լավ եմ արել, որ այդպես եմ արել, դա իմ իրավունքն է: Կարող եմ ասել նաեւ, որ այս իմ արարքը նման էր յուրօրինակ անակնկալի, որին երկրպագուներս համարժեք արձագանքեցին:

Այս նույն թեմայի առնչությամբ «Ժողովուրդ»-ը զրուցել է նաեւ երգիչ Արթուր Իսպիրյանի հետ:

-Ալլա Լեւոնյանի համերգից երկրպագուների մեծամասնության սպասելիքները կարծես թե արդարացան: Սակայն գրանցվեցին նաեւ հետաքրքիր միջադեպեր: Օրինակ` Ալլան երգը ընդհատեց` ողջունելով համերգին ուշացումով ժամանած Ռիտա Սարգսյանին եւ Հասմիկ Պողոսյանին: Ձեր գնահատմամբ` որքանով էր դա հարգալից դահլիճում գտնվող հանդիսատեսի հանդեպ:
-Դե, դա ավելի շատ ներքին խոհանոցին առնչվող հարց է: Եթե Ալլա Լեւոնյանը նման կերպ է վարվել, հնարավոր է՝ այս ամենի հետեւում ինչ-որ այլ բան կա: Շատ հնարավոր է, որ համերգի հովանավորներին է նա այդ կերպ ողջունել:
-Այդուամենայնիվ, որքանո՞վ էր նման պահվածքը Ճիշտ:
-Դե, իր գործն է, ինչ ասեմ, նա ինքն է որոշում, թե իր համերգները ինչպես կազմակերպի, ինչ ընթացք տա այդ ամենին: Ես ինքս որեւէ կոնկրետ բան չեմ կարող ասել: Տեղյակ էլ չէի, որ այդ համերգը տեղի է ունեցել արդեն: Կորպորատիվ միջոցառումների չեմ հաճախում, մենահամերգներ չեմ ունենում: Նմանատիպ երեւույթները, հավանաբար, հովանավորություն են ծածկում:

ԼՈՒՍԻՆԵ ՀԱԿՈԲՅԱՆ