ԴՊՐՈՑՆԵՐԸ ԲԹԱՑՆՈՒՄ ԵՆ ԱՇԱԿԵՐՏՆԵՐԻՆ

Դպրոցներում  աշակերտներին բթացնում են, այլ ոչ թե սովորեցնում: Երեւանի մի շարք դպրոցների, մասնավորապես թիվ 114, Ա. Պուշկինի անվան թիվ 8, Չեխովի անվան թիվ 55 դպրոցներում ուսուցիչները երեխաներին հանձնարարում են տնային  աշխատանք` միաժամանակ տրամադրելով էլեկտրոնային այս կայքերի հասցեները` g-college .com sovorel .am homework .am: Այստեղ էլ տեղադրված են տնային աշխատանքները` պատրաստի, լուծված վիճակում: Այսինքն` երեխաները, օգտվելով կայքից, առանց երկար-բարակ մտածելու արտագրում են առաջադրանքները եւ ներկայանում դասի: Ավելին, sovorel .am եւ homework .am կայքերն առաջադրանքի լուծման համար sms սակագներ են սահմանել, եւ ուսուցիչներին այս մոտեցումը ձեռնտու է այնքանով, որ ստուգողների մոտ խայտառակ չեն լինի: ԿԳՆ հանրակրթության վարչության պետ Նարինե Հովհաննիսյանը “Ժողովուրդ”-ի հետ զրույցում նշեց, թե հարցը կուսումնասիրեն եւ կհասկանան, թե իրականում ինչ է կատարվում: Փաստորեն, մինչեւ հիմա ՀՀ կրթության եւ գիտության նախարարությունը տեղյակ չէ, որ հայ աշակերտներին բթացնելու գործընթաց է ծավալվում: Հուսանք՝ նախարար Արմեն Աշոտյանը նախընտրական քարոզչության “ընդմիջումներին” կզբաղվի կարեւորագույն այս խնդրով: