Լույս է տեսել Գառնիկ Բանյանի «Հիշողություններ մանկությունից և որբությունից» գրքի ռուսերեն թարգմանությունը

«Ժառանգություն և առաջընթաց» հիմնադրամը հայտնում է, որ 2025 թվականի ապրիլի 22-ին, 1915 թվականի Հայոց ցեղասպանության զոհերի հիշատակի 110-րդ տարելիցի նախաշեմին, Մոսկվայում տեղի է ունեցել գրող Գառնիկ Բանյանի «Հիշողություններ մանկությունից և որբությունից» գրքի ռուսերեն հրատարակության շնորհանդեսը։

Գիրքն ընդգրկում է իրական պատմություններ հայ որբերի մասին, ովքեր 5-11 տարեկան հասակում Հայոց ցեղասպանության պատճառով հայտնվել են Օսմանյան կայսրության որբանոցներում։ Ամենամեծը, Անթուրայի որբանոցը, գործել է Լիբանանում, թուրքական վարչակարգի վերահսկողությամբ։ Որպես թուրքացման քաղաքականության մաս, հայ երեխաներին ստիպել են հրաժարվել իրենց լեզվից, հավատքից և ինքնությունից։ Չնայած դաժան պայմաններին, երեխաները շարունակել են գաղտնի խոսել հայերեն, աղոթել մայրենի լեզվով և պահպանել իրենց ազգային ինքնությունը։

Չորս տարիների ընթացքում միայն մեկ երեխա է համաձայնել իսլամ ընդունել, չնայած որ թուրքական կողմը հավատափոխներին ապահովում էր հարմարավետ պայմաններով և լիարժեք սննդով։ Այս բացառիկ տոկունությունը դարձել է ուսումնասիրության առարկա միջազգային առաջատար գիտական հաստատություններում, այդ թվում՝ Սթենֆորդի համալսարանում։

«Հիշողություններ մանկությունից և որբությունից» գիրքն արդեն հրատարակվել է մի շարք երկրներում, իսկ այժմ առաջին անգամ թարգմանվել է ռուսերեն։ Շուտով ընթերցողները հնարավորություն կունենան գիրքը ձեռք բերել նաև հայերեն տարբերակով։

Նախաձեռնությունն իրականացվել է «Ժառանգություն և առաջընթաց» մարդասիրական հիմնադրամի և «Անիվ» հայագիտության հիմնադրամի համագործակցությամբ՝ Արմեն Հեչոյանի և Արթուր Սողոմոնյանի նախաձեռնությամբ։ Շնորհանդեսին ներկա են գտնվել հայտնի հայ և ռուս գիտնականներ, հասարակական գործիչներ ու մշակութային ոլորտի ներկայացուցիչներ։ Գիրքը շուտով հասանելի կլինի նաև Հայաստանում։