Պահքի սեղան․ համշենական բերեխ․ ինչպե՞ս պատրաստել այն

Այսօր Մեծ Պահքի երկրորդ օրն է։ Այն տեւում է 48 օր՝ Բուն Բարեկենդանից մինչեւ Սուրբ Հարության տոն (Զատիկ)։
Պահքի շրջանում օգտագործում են բացառապես բուսական ծագում ունեցող սննդամթերք:

Ուստի՝ ArmLur.am-ը Մեծ Պահքի ողջ ընթացքում կներկայացնի բուսական կերակրատեսակներ, որոնք կարելի է ուտել պահքի ժամանակ։

Բերեխ կամ բերեկ

Բերեխը համշենական ավանդական գարնանային կարկանդակ է՝ պատրաստված բարակ գրտնակած խմորով ու կանաչիներով։
Այն թխվում է վառարանում կամ տապակվում՝ ստանալով համեղ, փխրուն կեղեւ։
Բերեխի պատրաստման հիմնական բաղադրիչներն են՝ սիբեխ, ավելուկ, եղինջ, համեմ, սպանախ, սոխ, երբեմն նաեւ ավելացնում են բրինձ կամ ձավար։
Բերեխի խմորը պատրաստվում է սովորական գոլ ջրով, ալյուրով ու աղով։ Ներկայումս բերեխ պատրաստելիս երբեմն կիրառվում է նաեւ շերտավոր խմոր։
Բերեխի միջուկը պատրաստվում է կանաչեղենով՝ կանաչիները կտրատվում են, խառնվում սոխառածի հետ ու համեմունքների հետ, ավելացնում եփած բրինձն ու ձավարը, ապա փաթաթվում եւ թխվում մինչեւ կարմրելը։

Բերեխը հիանալի տարբերակ է պահքի շրջանում։

Միշտ հիշե՛ք․ պահքի ընթացքում հրաժարվում են ոչ միայն որոշակի կերակուրներից, այլև մոլի սովորություններից, շատախոսությունից, ստախոսությունից, հայհոյանքից և այլ մեղքերից: Կերակրից հրաժարվելն առանց մեղքից հետ կանգնելու` անիմաստ ու անօգուտ է, որովհետեւ «սատանան միշտ պահքի մեջ է, ոչինչ չի ուտում, բայց մեղք գործելուց չի դադարում եւ չի հոգնում» (Սուրբ Գրիգոր Տաթեւացի):

Միշտ հիշե՛ք․ պահք պահում ենք մենք մեզ համար, մեր մեղքերից, վատ սովորություններից ազատվելու համար, այլ ոչ ցուցադրության համար։ Մատթեոս 6։16-18-ում գրված է․ «Երբ ծոմ պահեք, տրտմերես մի լինեք կեղծավորների նման, որոնք իրենց երեսներն այլանդակում են, որպեսզի մարդկանց այնպես երևան, թե ծոմ են պահում, ճշմարիտ եմ ասում ձեզ, այդ իսկ է նրանց վարձը, այսինքն` մարդկանց երևալը և նրանցից գովվելը: Այլ երբ դու ծոմ պահես, օծի քո գլուխը և լվա քո երեսը, որպեսզի չերևաս մարդկանց ծոմ պահող, այլ քո Հորը, գաղտնաբար, և քո հայրը, որ տեսնում է, ինչ որ ծածուկ է, կհատուցի քեզ»:

Նանիկ Աղասյան